«Almaty clean & green»: qalanyń barlyq aýdanynda 10 myńnan astam aǵash otyrǵyzyldy
Almatyda «Taza Qazaqstan» respýblıkalyq baǵdarlamasy men «Almaty – bizdiń ortaq úıimiz» qalalyq naýqany aıasynda «Almaty clean & green» atty aýqymdy tazalyq jáne kógaldandyrý aksıasy ótti. İs-sharanyń basty maqsaty – qala ekologıasyn jaqsartý jáne kógaldandyrý jumystaryn júrgizý, dep habarlaıdy aqshamnews.kz
«Almaty clean & green» aksıasy qala turǵyndaryn biriktirip, olar kóshelerdi, qoǵamdyq oryndardy, saıabaqtardy, skverlerdi jáne ózen jaǵalaýlaryn tazalaý jumystaryna belsendi qatysty. Sonymen qatar, senbilik barysynda aǵashtar men butalar otyrǵyzyldy. Aksıaǵa Almaty qalasynyń ákimi Erbolat Dosaev, máslıhat depýtattary, mádenıet qaıratkerleri, sportshylar, jastar men qoǵamdyq uıym ókilderi, ekobelsendiler jáne qala turǵyndary qatysty.
Tazarý kúninde ótken ekologıalyq aksıaǵa 50 myńnan astam turǵyn, 1 200-ge jýyq komýnaldyq qyzmetkerler qatysyp, 350-den astam arnaıy tehnıka jumyldyryldy. Aýqymdy tazalyq jumystary barysynda saıabaqtar, gúlzarlar, aýlalar jáne demalys oryndary tazartylyp, 8 myń tekshe metrden astam qoqys jınalyp, qala ákimdigi tarapynan arnaıy polıgonǵa shyǵaryldy.
«Almaty clean & green» aksıasynyń mańyzdy nátıjesi dep alma, almurt, shegirshin, qaraǵan, úıeńki jáne shaǵan syndy 10 myńnan astam aǵash otyrǵyzýdy aıtýǵa bolady. Aksıa ótken oryndarda mádenı-oıyn-saýyq baǵdarlamasy uıymdastyryldy.
Ekoaksıaǵa qatysqan qala turǵyndary men estrada juldyzdary oıyn bólisip, almatylyqtardy týǵan qalasyna qamqorlyq kórsetýge shaqyrdy.
Ekologıalyq bastamalarymen tanymal almatylyq Evgenıı Muhamedjanov ekologıalyq mádenıettiń mańyzdylyǵyn atap ótti.
«Ekologıalyq mádenıetti qalyptastyrý – qalamyzdy túrlendirýdiń negizgi qadamy. Bul Almatynyń ınvestısıalyq tartymdylyǵyn, týrısik áleýetin jáne jalpy ómir sapasyn arttyrady. Biz týǵan qalamyz úshin qoldan kelgenniń bárin jasaýǵa daıynbyz», – dedi ekolog.
Qoǵam qaıratkeri, QHA múshesi Rýstam Kaıryev mundaı sharalardyń óskeleń urpaqty tárbıeleýdegi mańyzdylyǵyna toqtaldy.
«Biz tek qoqys jınap qoımaı, ekologıalyq sanasy joǵary qoǵam qalyptastyrýdyń negizin qalap jatyrmyz. Búgin osyndaı ıgi iske úles qosqanyma qýanyshtymyn. Biz birge súıikti qalamyzdy taza ári jaıly ete alamyz, óıtkeni Almaty – bizdiń ortaq úıimiz!», – dedi ol.
Qazaqstannyń eńbek sińirgen qaıratkeri Aıgúl Qosanova osyndaı bastamalardyń mańyzyn atady.
«Árıne, bul aýqymdy ári mańyzdy jumys, óıtkeni súıikti qalamyzdyń tazalyǵy bizge, onyń turǵyndaryna baılanysty. Sol sebepti turaqty túrde osyndaı is-sharalarǵa qatysyp turamyz. Óıtkeni bárimiz osynda ómir súrip jatyrmyz, al qalamyzdyń tazalyǵy – árbirimiz úshin mańyzdy. Úıde otyrmaı, kireberisti, aýlany, kósheńizdi tazalańyz!» – dep ol turǵyndarǵa úndeý jasady.
Alataý aýdanynda ótken ekologıalyq aksıaǵa qatysqan ánshi Óktem Altaev mundaı is-sharalardyń sergitip, kóterińki kóńil-kúı syılaıtynyn aıtty.
«Men Almatynyń tazalyǵyna úles qosý úshin qatysyp otyrmyn. Munda naǵyz merekelik atmosfera ornaǵan. Naýryz meıramy men qasıetti Ramazan aıynyń osy is-sharamen tuspa-tus kelýi erekshe áser syılap tur. Aksıa joǵary deńgeıde ótýde. Almatyny jaqsy kóreıik, onyń tazalyǵyn saqtaıyq – bizdiń súıikti qalamyz árdaıym júregimizde!» – dedi ónerpaz.
Qazaqstannyń eńbek sińirgen qaıratkeri, estrada jáne opera ánshisi Tolqyn Zabırova almatylyqtardy merekemen quttyqtap, aksıaǵa belsene qatysty.
«Búgin Almaty qalasynyń turǵyndary men qonaqtary úshin erekshe, umytylmas kún. Bárimiz bir otbasy sekildi birigip, qalamyzdy kórkeıtýge kiristik: aǵash otyrǵyzyp, aınalany tazartyp jatyrmyz. Súıikti qalamyz Almatyny taza ustaımyz, óıtkeni Almaty – bizdiń úıimiz, al úı taza bolýy kerek. Sondyqtan qoqys tastamaıyq, túkirmeıik, jaman áreket jasamaıyq, qalamyzdy aıalaýymyz kerek. Almaty shynymen de álemdegi eń ádemi, eń kórikti qalanyń biri!», – dedi ol.
Qoǵam qaıratkeri Beknur Qısyqov mundaı is-sharalardyń azamattyq belsendilikti nyǵaıtatynyn atap ótti.
«Biz osy is-shara arqyly qalaǵa qamqorlyq jasaý mádenıetin qalyptastyramyz. Almaty Clean & Green – jaı ǵana ekologıalyq bastama emes, bul – janashyr adamdardy biriktiretin qozǵalys», – dedi ol.
Qazaqstannyń eńbek sińirgen qaıratkeri Sulýshash Nurmaǵambetova senbiliktiń tárbıelik mánine toqtaldy.
«Jastardy osyndaı is-sharalarǵa tartý óte mańyzdy. Bul tek tazalyq jumystary emes, azamattyq jaýapkershilik pen týǵan jerge degen súıispenshiliktiń mektebi. Men Almatyda 50 jylǵa jýyq ýaqyt turamyn, qalamyzdyń árdaıym taza bolǵanyn qalaımyn!», – dedi ol.
Teatr jáne kıno aktrısasy Móldir Serikbaı shyǵarmashylyq adamdarynyń mundaı aksıalarǵa qatysýynyń mańyzdylyǵyn jetkizdi.
«Biz óner adamdary sahnada mańyzdy máselelerdi jıi kóteremiz. Biraq búgin men ony is júzinde kórsetýdi jón kórdim. Qalaǵa degen mahabbat oǵan qamqorlyq jasaýdan bastalady», – dedi ol.