«Almaty Clean&Green». Mereke qarsańynda Naýryzbaı aýdanynda ótken ekologıalyq aksıa osylaı atalady. Respýblıkalyq «Taza Qazaqstan» baǵdarlamasy men qalamyzdaǵy «Almaty – ortaq úıimiz» eko-naýqany qazir jańarýdyń jarshysy áz-Naýryzben tipti de astasyp, aıryqsha mánge ıe bola tústi.
Almaty qalasy ákiminiń orynbasary Azamat Qaldybekov qatysqan búginshi ekologıalyq aksıaǵa ekologtar, eriktiler men belendiler, sondaı-aq, aýdan turǵyndary da atsalysty.
Sharanyń basty maqsaty – ulttyq mereke qarsańynda rýhanı tazarý, ulttyq bolmysqa mán berý. Sondaı-aq, qorshaǵan ortamyzdy, aınalamyzdy taza ustaýǵa kúsh salý. Nátıjesinde tóńirektegi aryqtar arshylyp, oryndyqtar, aýlalar tazartyldy.
– Búgin – Memleket basshysy bastamasymen júzege asqan «Naýryznama onkúndigi» baǵdarlamasyndaǵy «Tazarý kúni». «Taza Qazaqstan» aksıasy aıasynda ekologıalyq naýqanǵa qala ákimi bastamashylyq etip, zıaly qaýym men mádenıet ókilderi basqa da sala qyzmetkerleri atsalysýda. Qorshaǵan ortany taza ustaý – el men jerge degen izgi qurmettiń belgisi. Maqsat – tabıǵatqa janashyrlyq sezimin, ortany qorǵaý mádenıetin qalyptastyrý,_ – dedi Azamat Qaldybekov.
Qolǵa alynǵan ıgi ister, atqarylyp jatqan ilkimdi sharýalardiń nátıjesi jaıynda eko-belsendiler de óz oılaryn ortaǵa salyp, áleýmettik ómirdegi qorshaǵan orta tazalyǵynyń mańyzy jaıynda kózqarastaryn bólisti.
– Bul ekologıalyq aksıaǵa 500-den asa adam jumyldyryldy. Qatysýshylardy yntalandyrý úshin 10 nomınasıa boıynsha baǵalaý túzimin de qostyq. Osyndaı senbiliktiń arqasynda qala tazalanyp, aýla gúldenip, aınala jınaqy turady, – dedi Naýryzbaı aýdany ákiminiń orynbasary Aınur Bekjanova.
Al Naýryzbaı aýdany Kóriktendirý bóliminiń basshysy Ońalbek Qydyrbaev senbiliktiń barysyn egjeı-tegjeıli túsindirdi:
– Senbilikte oryndyq, sharbaq, jaqtaýlardy boıalyp, qýraǵan qýrandy shópter shabylyp, jalpy qystan keıingi tazalaý jumystar jasaldy. Sondaı-aq aǵash egilip, taldardyń túbi qopsytylyp, qoqys shyǵarylyp, jaryq shamdar jóndeldi. Tazalaý jumystary Abaı dańǵylynyń Alataý men Stroıtelnaıa kósheleriniń aralyǵyn qamtydy,_ – dedi ol.