İsten shyqqan nemese kereksiz zattarǵa ekinshi ómir syılaýǵa bolady.
Bir qaraǵanǵa kereksiz, jaramsyz bolyp kórinetin zattar da úı-turmysta úlken paıda ákelýi múmkin. Shashyńyzǵa týra kelmeıtin sýsabyn nemese shomylýǵa arnalǵan gel, ıisi unamaıtyn losón, gel, túsi sizge týra kelmeıtin dalap – munyń bári sóreńizdegi oryndy tekke alyp turady. Tastap jiberýge de qımaısyz. Almaty-akshamy.kz Ernur.kz portaly jarıalaǵan paıdaly keńesterdi nazarlaryńyzǵa usynady:
Losón, tonık, mısellárly sý
Quraldardyń paıdaǵa aspaı qalýynyń birneshe sebebi bar: ıisi unamaı qalady, terińizge jaqpaıdy, saqtaý merzimi bitýge jaqyn. Qandaı paıdaǵa asyrýǵa bolady? Jaqsy antıseptık: spırtti tonıkter qoldy, telefondy, klavıatýrany jaqsy tazartyp, zalalsyzdandyrady. Kıimdegi daqtardy jaqsy tazartady. Zatbelgi men japsyrmalardy kúsh salmaı-aq jyldam ketiredi. Mısellárly sý ashyq tústi bylǵarydan tigilgen kıimdegi turyp qalǵan daqty jaqsy ketiredi. Aına men shyny zattardy jaltyratyp tazartýǵa bolady.
Eger qolyńyzda aına tazartatyn qural bolmasa, onda ornyna losón men tonık kómektesedi. Aına súrtetin shúberekke kishkene ǵana quıyp alsańyz jetkilikti. Sýsabyn, dýshqa arnalǵan gel, shashqa arnalǵan bálzam Kez kelgen sýsabyn nemese sebezgige arnalǵan gel úıdi retke keltirýde jaqsy kómekshi. Edendi, jıhazdardy, kafeldi súrtetin kezde eki-úsh as qasyq qosyp jiberseńiz, tek tazartyp, jyltyratyp qana qoımaıdy, sonymen birge hosh ıis te beredi.
Balalardy qýantyńyz
Sýsabyn nemese sebezgige arnalǵan gelden keremet kópirshikter shyǵady. Muqıat jýýdy qajet etetin kıimderdi sýsabyn nemese sebezgige arnalǵan gelmen jýatyn bolsańyz, untaqpen jýǵandaı kóp ýaqyt almaıdy jáne bastapqy túsi ońyp ketpeı jaqsy saqtalady. Al shashqa arnalǵan bálzam, kıimderdi jumsaq etip turady. Iaǵnı shaıǵysh (opolaskıvatel) ornyna paıdalana alasyz.
Dalap nemese eringe arnalǵan bálzam
Eringe arnalǵan bálzam bylǵarydan jasalǵan aıaq kıimniń artqy bóligin jaqsy jumsartady, múıizgek bolýdan saqtaıdy. Sondaı-aq aıaq kıimge arnalǵan kremdi almastyrady. Aıaq kıimdi jaltyratyp, jumsartyp, usaq syzyqtardy jasyrady. Eger balańyzdyń báteńkesiniń baýy jıi sheshilip kete berse, onda gıgıenalyq dalap jaqsy kómektesedi. Baýǵa dalapty jaǵyp qoısańyz jetkilikti. Sonymen birge sómkedegi, jeıdedegi júgirtpeler bir ornynda tistelip qalsa, gıgıenalyq dalap jaǵyp qoıyńyz. Qolyńyz isip ketip saqınańyz shyqpaı qalsa, eringe arnalǵan bálzam nemese maıly dalapty saqına aınalasyna jaqsańyz tez shyǵady. Bir qaraǵanǵa kereksiz, jaramsyz bolyp kórinetin zattar da úı-turmysta úlken paıda ákelýi múmkin, bul bir jaǵynan qarajatqa únem. Tek ol úshin kishkene oı men fantazıany iske qosý kerek.