University Medical Center klınıkalarynda donorlyq aǵzalardy transplanttaý boıynsha sátti júrgizilgen operasıalar aǵzany transplanttaýdyń kútý paraǵynda turǵan bes adamnyń ómirin saqtap qaldy.
Donor gemorragıalyq ınsýlt alǵan 44 jastaǵy áıel boldy, dárigerler konsılıýmy mıdyń ólimin rastady. Qıyn jaǵdaıda onyń týystary bul qadamnyń mańyzdylyǵyn túsinip, qaıtys bolǵannan keıin aǵzalardyń donorlyǵyna kelisim berdi.
UMC júrek ortalyǵynda medısınalyq top buryn mehanıkalyq qan aınalymyn qoldaý qurylǵysy LVAD ımplantattalǵan 43 jastaǵy pasıentke donorlyq júrekti transplanttaýdy júrgizdi. Ekinshi pasıentke ókpeni transplantattaý júrgizildi. UMC Ana men bala ortalyǵynda 15 jasar qyzǵa búırek transplanttaý júrgizildi . Barlyq resıpıentterdiń jaǵdaıy qanaǵattanarlyq, olar mamandardyń baqylaýymen ońaltýdan ótedi.
Sondaı-aq, ekinshi donorlyq búırek pen baýyr Astana qalasynyń Ulttyq ǵylymı onkologıalyq ortalyǵynda pasıentterge transplantattaldy.
Donorlyq aǵzalardy transplanttaý eń kúrdeli operasıalardyń biri bolyp tabylady, alaıda tájirıbe, daǵdylar jáne tehnıkalyq jaraqtandyrý olardy bizdiń elimizde joǵary deńgeıde oryndaýǵa múmkindik beredi. Júrek pen ókpeni transplantattaý qaıtys bolǵannan keıingi donordan, mıdyń ólimi rastalǵan kezde ǵana júzege asyrylady. Alaıda, odan ári proses kóbinese áleýetti donordyń jaqyn týystarynyń sheshimine baılanysty.
Aǵzalardy transplanttaýdy sátti júrgizý - bul ártúrli memlekettik jáne medısınalyq qyzmetterdiń úılesimdi toptyq jumysy. Transplantologtar toby birinshi kezekte donordyń jaqyndary men týystaryna, aǵzalardy transplantattaý boıynsha birqatar kúrdeli operasıalardy qaýipsiz júzege asyrýǵa kómekteskenderdiń barlyǵyna alǵysyn bildiredi.