Interaktıvti kartany engizý qaıtarylǵan aýyl sharýashylyǵy jerlerin bólý boıynsha jumysty ashyq ári aıqyn etedi
Qazaqstanda memlekettik menshikke qaıtarylǵan aýyl sharýashylyǵy jerleriniń ınteraktıvti kartasy iske qosyldy, ony Aýyl sharýashylyǵy mınıstrligi men Sıfrlyq damý jáne aeroǵarysh ónerkásibi mınıstrligi birlesip ázirledi. jerkarta.gharysh.kz geoservısinde buǵan deıin ıgerilmegen, zańsyz berilip, memleketke qaıtarylǵan ýchaskeler týraly barlyq aqparat ornalastyrylǵan, dep habarlaıdy Almaty-akshamy.kz.
Interaktıvti karta azamattarǵa kez kelgen ýaqytta qaıtarylǵan aýyl sharýashylyǵy jerleri boıynsha monıtorıńti júzege asyrýǵa múmkindik beredi jáne osy ýchaskelerdi alý maqsatynda jergilikti atqarýshy organdarǵa ótinish berý úshin baǵdar bolady. Bul jyldar boıy paıdalanylmaǵan aýylsharýashylyq jerlerin aınalymǵa tartýǵa, sondaı-aq turǵyndardy aýyl sharýashylyǵy úshin qajetti alańdarmen qamtamasyz etýge múmkindik beredi.
Búgingi kúni oblystar men aýdandar bólinisinde ınfografıkany ázirleý, sondaı-aq portaldyń ınterfeısin toltyrý prosesi aıaqtalyp jatyr.
Interaktıvti kartany engizý qaıtarylǵan aýyl sharýashylyǵy jerlerin bólý boıynsha jumysty ashyq ári aıqyn etedi. Ýchaskelerdi qaıta bólýdiń odan ári monıtorıńin aýmaqtyq jer resýrstaryn basqarý jónindegi departamentter, ákimdikter men prokýratýra qyzmetkerleri qol jetkize alatyn jyljymaıtyn múliktiń biryńǵaı memlekettik kadastry platformasynda júzege asyrý josparlanyp otyr.
Qaıta bólý prosesiniń ashyqtyǵyn qamtamasyz etý úshin konkýrstardy ótkizý modýlin Elektrondyq saýda alańynyń bazasynda iske asyrý usynylady. Qazirgi ýaqytta zańnamaǵa sáıkes, jer paıdalaný quqyǵyn berý jónindegi konkýrs qaǵaz júzinde ótkiziledi.