Elimiz tabıǵı ýran óndirý boıynsha álemde birinshi orynda
Memleket basshysy Birikkken Arab Ámirlikterine resmı sapary aıasynda «Abý Dabı turaqty damý aptalyǵy» samıtine qatysty. Prezıdent samıt qatysýshylaryna Qazaqstandaǵy jańartylatyn jáne balamaly energıa kózderiniń perspektıvalary týraly málimet berdi, dep habarlaıdy Almaty-akshamy.kz Aqordanyń baspasóz qyzmetine silteme jasap.
– Kún men jel faktorlary, sondaı-aq ulan-ǵaıyr jerimiz Qazaqstannyń klımatty saqtaý jolyndaǵy jahandyq is-áreketterge atsalysyp, jańartylatyn energıa sektorynda kósh bastaýyna múmkindik beredi. Osyǵan baılanysty biz ınvestorlarǵa anaǵurlym utymdy sharttar usyný úshin normatıvtik-quqyqtyq bazany jetildirip jatyrmyz. Jalpy, bizdiń josparymyz boıynsha 2035 jylǵa qaraı Qazaqstanda 6,5 GVt jańartylatyn energıa resýrsy paıda bolady. Bul oraıda «jasyl sýtegi» – keleshegi zor baǵyttyń biri. Halyqaralyq sarapshylardyń pikirinshe, elimiz sýtegin eksporttaýshylardyń alǵashqy ondyǵyna kire alady, – dedi Qasym-Jomart Toqaev.
Prezıdent atom energıasyn paıdalaný máselesine nazar aýdaryp, bul aýaǵa taraıtyn parnıktik gazdardyń kólemin azaıtýǵa áser etetin basty faktordyń biri ekenin aıtty. Sondaı-aq Qazaqstannyń atom energetıkasyn damytýdaǵy artyqshylyqtaryna toqtaldy.
– Elimiz tabıǵı ýran óndirý boıynsha álemde birinshi orynda. Biz ıadrolyq otynnyń komponentterin óz elimizde óndiremiz jáne atom energıasyn qaýipsiz paıdalaný isin odan ári damytýǵa múmkindigimiz mol. Bizdiń pikirimizshe, bul – aımaqtyq jáne jahandyq deńgeıdegi saýda men ınvestısıa úshin keleshegi mol sala, – dedi Memleket basshysy.