Aıyptalýshy sotqa onlaın rejımde qatysyp otyr.
Astanada Qaırat Satybaldynyń isi boıynsha kezekti sot otyrysy bastaldy, dep habarlaıdy Almaty-akshamy.kz Almaty.tv silteme jasap.
Aıyptalýshy sotqa onlaın rejımde qatysyp otyr. Satybaldy Qylmystyq kodekstiń 195-baby (Aldaý nemese senimdi teris paıdalaný jolymen múliktik zalal keltirý) jáne 189-baby ( Senip tapsyrylǵan bóten múlikti ıemdenip alý nemese talan-tarajǵa salý) boıynsha aıyptalýda.
Otyrystyń basynda aıyptalýshy Satybaldy beınebaılanys arqyly týǵan-týystarymen sóılesti. Kameraǵa túspeýge de keńes berdi.
«Senderde kamerada otyrýdyń qajeti joq. Bylaı qoıyp, qyrynan bárin qarap otyrsańdar bolady», - dedi ol.
Osydan keıin bir tilshi: "Siz qaryzdyń bir bóligin qaıtardyńyz ǵoı. Qazir ne úshin aıyptap jatyr?", - dep surady.
Aıyptalýshy sot aıaqtalmaıynsha túsinikteme bere almaıtynyn jetkizdi.
«Áli sot bitken joq. Keshirińiz, men qazir eshteńe aıta almaımyn», - dep atap kórsetti aıyptalýshy.
Aıta keteri, bıyl 13 naýryzda sybaılas jemqorlyqqa qarsy qyzmet Qaırat Satybaldynyń ustalǵanyn habarlady.
Ol "Qazaqtelekom" AQ-nyń qarajatyn asa iri kólemde jymqyrdy degen kúdikke ilingen. Sondaı-aq memleket qaýipsizdigine nuqsan keltiretin basqa da qylmystarǵa qatysy bar-joǵy tekserilip jatqany aıtylǵan edi.
24 tamyzda Sybaılas jemqorlyqqa qarsy qyzmet Qaırat Satybaldyulyna jáne basqa da tulǵalarǵa qatysty "Qazaqtelekom" AQ jáne "Kólik servısi ortalyǵy" AQ-nyń qarjysyn iri kólemde jymqyrý faktileri boıynsha sotqa deıingi tergeýdi aıaqtady. Qaırat Satybaldy – tuńǵysh prezıdent Nursultan Nazarbaevtyń nemere inisi.
Qaırat Satybaldynyń burynǵy áıeli Gúlmıra Satybaldy da qamaýǵa alyndy. Ol Ýnıversıada-2017 nysandaryn jóndeýge bólingen aqshany urlady dep aıyptalyp jatyr.
Tergeý kezinde aıyptalýshylardyń 240 mıllıard teńgeden (500 mıllıon dollar) astam zańsyz aktıvteri men qarjysy memleketke qaıtarylǵan bolatyn.