Ol áýejaı aýmaǵynda ustalǵan.
Sybaılas jemqorlyqqa qarsy is-qımyl agenttiginiń tóraǵasy Oljas Bektenov keshe Qaırat Satybaldynyń ustalýyna qatysty pikir bildirdi, dep habarlaıdy Almaty-akshamy.kz QazAqparatqa silteme jasap.
«Qylmystyq is «Qazaqtelekom» AQ-nyń qarajatyn jymqyrý faktisi boıynsha tergelip jatyr. Keshe osy boıynsha tıisti aqparat taratyldy. Qazirgi kezde qarajat somasy anyqtalyp jatyr, ol boıynsha birneshe epızod qamtylǵan. Osy oraıda saraptama júrgizilgennen keıin, biz bul somany jarıa etemiz. Degenmen osy iske qatysty mıllıardtaǵan qarajat bar dep aıta alamyn», - dedi O.Bektenov Májilistiń jalpy otyrysynan keıin tilshilerdiń saýalyna jaýap bere otyryp.
Sonymen qatar ol Qaırat Satybaldynyń áýejaı aýmaǵynda ustalǵanyn aıtty.
«Ol Almaty áýejaıynyń aýmaǵynda ustaldy. Ustalǵannan keıin ýaqytsha ustaý ızolátoryna qamaldy. Tergeý amaldary barysynda qaraımyz, bultartpaý sharasyn sot aıqyndaıdy», - dedi agenttik basshysy.
Budan buryn habarlanǵandaı, Sybaılas jemqorlyqqa qarsy qyzmet laýazymdyq ókilettikterin asyra paıdalaný jáne «Qazaqtelekom» AQ-nyń qarajatyn asa iri kólemde urlaý faktileri boıynsha qylmystyq isti tergeýde.