38 mıllıard teńge qolma-qol aqsha men 4,2 mıllıard teńgeniń jyljymaıtyn múlikteri tárkilendi
Qarjylyq monıtorıń agenttigi asa iri kólemde memleket qarjysyn jymqyrdy jáne aqshany jylystatty degen kúdikke ilingen Qaırat Boranbaev pen onyń senimdi adamy Nahanovqa, «QazMunaıGaz» UK» AQ Basqarýshy dırektory Ibýlla Serdi jáne «QazaqGaz» UK» AQ Basqarma tóraǵasynyń orynbasary Januzaq Taıyrǵa qatysty istiń tergeýin aıaqtaǵanyn málimdedi, dep habarlaıdy Almaty-akshamy.kz.
Olar 2019 jyly baqylaýdaǵy «Azıagaz Chýndja» JSHS arqyly gazdy jetkizý kezinde Qazaq Gaz (burynǵy QazTransGaz) ulttyq kompanıasynyń qarajatyn jymqyrýdyń qylmystyq sqemasyn júzege asyrǵan. Urlanǵan 14,5 mlrd teńge kólemindegi qarajat keıinnen zańdy kásipkerlik qyzmetten dıvıdend retinde bólý jáne tóleý jeleýimen zańdastyrylǵan. Osylaısha, kúdiktiler jasalǵan zańsyz operasıalardyń shyn mánin jasyrǵan. Tergeý barysynda keltirilgen shyǵyn tolyq kólemde óteldi.
Sonymen qatar, 38 mıllıard teńge qolma-qol aqsha men 4,2 mıllıard teńgeniń jyljymaıtyn múlikteri tárkilendi. Osy bólim boıynsha tergeý aıaqtaldy, materıaldar proseske qatysýshylarǵa tanystyrý úshin berildi.
Sonymen birge, Avstrıa, Latvıa, Lúksembýrg, Moldova, Tájikstan, Birikken Arab Ámirlikteri jáne Estonıadan zań aıasyndaǵy kómeginiń nátıjesi kelmegendikten, Boranbaevtyń zańsyz áreketteriniń basqa epızodtary boıynsha tergeý jalǵasýda.
Sonymen qatar, Agenttik zańsyz kiristerge satyp alynǵan sheteldik aktıvterdi anyqtaý jáne buǵattaý jumystaryn júrgizýde. Sheteldik áriptesterden materıaldar kelip túskennen keıin tıisti quqyqtyq baǵa beriledi.
Aıta ketý kerek, 2010 jyldan beri Boranbaevpen enshiles kompanıalar Qazaqstanda óndirilgen gazdyń edáýir bóligin shetel shottarynda kiris shoǵyrlanýymen eksporttaǵan. Bul áreketter ulttyq múddege qaıshy jasaldy. Tergeý jumystarynyń nátıjesinde, bıyldan bastap jyldyq quny 440 mln AQSH dollarynan asatyn (207 mlrd teńge) qazaqstandyq gazdyń kórsetilgen kólemi el ishindegi tutynýshylarǵa jáne memlekettiń eksporttyq áleýetin arttyrýǵa baǵyttaldy.