Qorǵanys mınıstrligi qaı sanattaǵy adamdar áskerı qyzmetten bosatylýy múmkin ekenin jáne ásker qataryna shaqyrylmaıtynyn túsindirdi.
Qoldanystaǵy zańnamaǵa sáıkes, merzimdi áskerı qyzmetke shaqyrý boıynsha merzimin keıinge qaldyrý nemese bosatý sheshimi áskerge shaqyrý komısıasynyń quzyretinde, dep habarlaıdy Almaty-akshamy.kz QazAqparatqa silteme jasap.
«Bul turǵyda keıinge qaldyrý otbasy ári densaýlyq jaǵdaıyna, oqýyn jalǵastyrǵandarǵa, kásibı qyzmetin atqaryp júrgen pedagogterge, aýyldaǵy dárigerlerge, Parlamenttiń nemese jergilikti ókildi organdardyń depýtattaryna qatysty bolady», - delingen Qorǵanys mınıstrliginiń jaýabynda.
Sonymen qatar, aldyn ala tergeý amaldaryna tartylǵan nemese qylmystyq isin sot qarap jatqan adamdar jaýyngerlik jıyndarǵa shaqyrtylmaıdy.
Budan bólek, azamattyq áýe kemeleriniń ushý ekıpajynyń múshelerine, tıisti bilimi bar azamattyq avıasıa ınjenerleri, mehanıkteri jáne tehnıkterine, sondaı-aq quqyq qorǵaý organdarynyń bilim berý uıymdarynda alǵashqy kásiptik daıarlyqtan ótip jatqandarǵa qatysty áskerge shaqyrýdy keıinge qaldyrý tártibi qarastyrylǵan.
Beıbit ýaqytta áskerı qyzmetke shaqyrýdan myna azamattar bosatylady:
1) densaýlyq jaǵdaıy boıynsha áskerı qyzmetke jaramsyz dep tanylǵan;
2) jıyrma jeti jasqa tolǵan, zańdy negizder boıynsha merzimdi áskerı qyzmetke shaqyrylmaǵan;
3) týystarynyń biri (ákesi, anasy, aǵa-inileri nemese apa-sińlileri) áskerı qyzmetti óteý kezeńinde mindetin oryndaý barysynda qaza tapqanda nemese birinshi nemese ekinshi toptaǵy múgedektik belgilengende;
4) áskerı qyzmetti basqa memlekette ótkender;
5) Qazaqstan Respýblıkasynyń arnaýly memlekettik organdarynda qyzmet ótkergender;
6) ǵylymı dárejesi bar azamattar;
7) tirkelgen dinı birlestikterdiń din qyzmetkerleri.
Budan basqa, beıbit ýaqytta áskerı qyzmetke sottalǵan adamdar shaqyrylmaıdy.