Aptap ystyqtan Eýropanyń birneshe elinde alqaptar laýlap jatyr.
Grekıa astanasyna jaqyn jerde orman órtke oranyp, myńdaǵan adam evakýasıalandy. Kanada da jaǵdaı ýshyǵyp barady. Tabıǵat apatymen kúreske myńdaǵan órt sóndirýshi jumyldyrylǵan, dep habarlaıdy Almaty-akshamy.kz 24.kz-ke silteme jasap.
Grekıa astanasy Afınaǵa jaqyn jerdegi orman órtke oranyp, myńdaǵan adam evakýasıalandy. Jalyn shahardan 30 shaqyrymdaı jerde Neos-Kývaras eldi mekenniń mańyndaǵy alqapty sharpyǵan. Tabıǵat apatyna baılanysty jergilikti turǵyndar men Lýtrakı kýrortyndaǵy lagerden 1 myńnan asa bala qaýipsiz jerge kóshirildi. Aldyn ala boljam boıynsha órt ormanǵa qasaqana qoıylǵan. Qazir tilsiz jaýmen júzdegen órt sóndirýshi kúresip jatyr. Áskerıler jumyldyrylyp, tikushaqtar qoldanylýda. Biraq mamandar órtti sóndirýge jel kedergi keltirip tur deıdi.
Ispanıa, La-Palmada orman órtimen kúres jalǵasyp jatyr
Ispanıanyń La-Palma aralynda da ótken senbi kúni bastalǵan orman órti áli kúnge deıin tolyq sóndirilgen joq. Laýlaǵan jalyn 50 myń gektar jerdi kúlge aınaldyryp úlgerdi. Ondaǵan úı janyp ketti. Órt sóndirýshiler araldaǵy orman órtiniń basym bóligin sóndirgen. Qazir jalynnyń shaǵyn oshaqtaryn óshirýge kúsh salynyp jatyr. Tabıǵat apatyna baılanysty 4 myńnan asa turǵyn qaýipsiz jerge kóshirildi.
Kanadada órt órship tur
Kanadada da orman órti basylmaı tur. Ásirese Brıtanıalyq Kolýmbıa provınsıasynda jaǵdaı nashar. Aımaqta qazir 400-ge jýyq alqapty órt sharpyǵan. Jyl bastalǵaly laýlaǵan jalyn óńirde 1 mıllıon 200 myń gektar jerdi typ tıpyl etti. Tilsiz jaýmen 2 myń órt sóndirýshi kúresip jatyr. Sońǵy birneshe kúnde 2 órt sóndirýshi qaza boldy. AQSH, Meksıka, Ońtústik Koreıa, Avstralıa, Fransıa jáne Jańa Zelandıa járdemge júzdegen mamanyn attandyrǵan. Kanada bıyl eń aýqymdy orman órtterin bastap keship jatyr. Jyl bastalǵaly elde 10 mıllıon gektar jer kúlge aınalǵan. Bul Irlandıa jáne Belgıa aýmaǵymen birdeı jer.
AQSH, Kalıfornıa aptap ystyqtan ormandar órtene bastady
AQSH-tyń Kalıfornıa shtatynda da apatap ystyqtan ormandar órtene bastady. Aımaqtyń birneshe okrýginde alqaptardy órt sharpyǵan. Tilsiz jaýmen kúreske júzdegen maman jumyldyrylǵan. AQSH meteorologıalyq qyzmeti Nevada men Iýta shtatynda da kún qatty ysyp, orman órti qaýipi kúsheıgenin aıtady. Qos aımaqta aldaǵy kúnderi synap baǵanasy 45 gradýsqa deıin kóteriledi degen boljam bar.