Májilis tóraǵasy Erlan Qoshanov Parlament palatalarynyń birlesken otyrysynda qaı sala mamandarynyń jalaqysy kóterilgenin aıtty, dep habarlaıdy almaty-akshamy.kz.
Ol depýtattar sesıada birqatar mańyzdy zań jobalary boıynsha Úkimetpen birlese jumys istegenin atap ótti.
Biz basty qarjy qujatyn – Respýblıkalyq búdjetti qabyldadyq. Osy qujat arqyly memlekettiń densaýlyq saqtaý, bilim berý, áleýmettik qamsyzdandyrý jáne basqa da saladaǵy negizgi áleýmettik mindettemelerin iske asyrýdy qamtamasyz etti. Mysaly, muǵalimderdiń, dárigerlerdiń, ǵalymdardyń jalaqysy kóbeıtildi. Olardyń áleýmettik turǵydan qorǵalýyn kúsheıtý sharalary qabyldandy. Stýdentterdiń shákirtaqysy ósti, - dep aıtty Erlan Qoshanov palatalardyń birlesken otyrysynda.
Májilis spıkeri atap ótkendeı, shamamen 1,8 mln jaldamaly qyzmetkerdiń, onyń ishinde 350 myń búdjet qyzmetkeriniń aqshalaı tabysy artty.
Bıyl qańtar aıynan bastap eń tómengi jalaqy deńgeıi 70 myń teńgeden 85 myń teńgege deıin kóterildi.
Osy sesıada zıandy eńbek jaǵdaıynda jumys isteıtin adamdardy áleýmettik turǵydan qorǵaý máselesin sheshe aldyq. Qabyldanǵan zań óndiriste jumys isteıtin 400 myńnan astam kópten kútken máselesine naqty jaýap boldy, - dep atap ótti Qoshanov palatalardyń birlesken otyrysynda.