Bıyl eńbek demalysyn alýǵa eń qolaıly ýaqyt qashan? Aqshamnews.kz tilshisi eńbek demalysyn qaı aıda alǵan durys ekenin eseptep kórdi.
Eńbek demalysy úshin tólem mólsheri árqashan ártúrli túsetinin baıqaǵan bolarsyz. Óıtkeni demalys mólsheri aıdaǵy jumys kúnderiniń sanyna baılanysty: jumys kúnderi neǵurlym kóp bolsa, tólem mólsheri soǵurlym joǵary bolady.
Sonymen:
2025 jyly eńbek demalysyna shyǵý úshin eń tıimdi aılar - sáýir, shilde, qazan jáne jeltoqsan. Osy aılarda 22 jumys kúni bar, sondaı-aq tamyz jáne qyrkúıekte 21 jumys kúni bar.
Sary tús – jumys kúnder;
Jasyl tús – mereke kúnder;
Qyzyl – demalys kúnder.
Al eger siz uzaǵyraq demalǵyńyz kelse, onda eńbek demalysyn qańtar, naýryz nemese mamyrda, demalys mereke kúnderine túsetindeı etip alý qajet. Sonda siz kóbirek demalasyz, biraq ádettegiden az aqsha alasyz. Tizimde joq qalǵan aılarda erekshe aıyrmashylyq joq.
Eskertý! Tólem mólsherine aýrýhana, demalys jáne taǵy basqa faktorlar áser etýi múmkin.
Eńbek demalysyna qashan shyǵýǵa bolady?
Jumysqa ornalasqannan keıin alty aı jumys istegen kez kelgen qyzmetkerdiń eńbek demalysyna shyǵýǵa quqyǵy bar. Bul merzim aıaqtalǵan soń, basshylyqqa eki apta buryn eskertip, demalysqa suranýǵa bolady.
Alaıda eger siz resmı eńbek shartysyz, ıaǵnı jalaqyny «konvertpen» alyp jumys istep júrseńiz, demalys máselesi qıynǵa soǵýy múmkin. Sebebi zań júzinde jumys berýshi sizdiń demalysyńyzdy rásimdeýge mindetti emes.
Demalys qansha kúnge sozylady?
Qazaqstannyń Eńbek kodeksi boıynsha, qyzmetker jyl saıyn 24 kúntizbelik kún demalys alýǵa quqyly. Bul kúnderdi bólip alýǵa bolady, biraq kem degende bir bóligi 14 kúnnen az bolmaýy qajet. Keıbir mekemelerde eńbek shartyna sáıkes budan da kóp kún demalys qarastyrylýy múmkin.
Eger eńbek sharty toqtaǵan bolsa, al siz eńbek demalysyna beriletin kúnderdi paıdalanbaǵan bolsańyz, jumys berýshi sizge ótemaqy berýge tıis.
Qaı aıda demalǵan tıimdi?
Demalys ýaqytyna tólenetin qarajat keıde bir aılyq tabysyńyzdan kóp ne az bolýy múmkin. Sondyqtan demalysqa qaı kezde shyǵý tıimdi ekenin bilgen jón.
Aıta ketý kerek, demalys kúnderi jumys kúnderimen emes, kúntizbelik kúndermen esepteledi. Iaǵnı, demalysqa shyqqanda oǵan demalys kúnderi de kiredi, biraq ol kúnderge qosymsha aqy tólenbeıdi. Al memlekettik merekeler demalys ýaqytyna kirmeıdi, sondyqtan demalys merzimi uzarady.
Eńbek demalysyn alarda uzaǵyraq demalǵyńyz kele me nemese kóbirek aqsha alǵyńyz kele me, sheship alyńyz. Sheshimińizge qaraı eńbek demalysyna shyǵý kerek aıda ózgeredi.