Búginde Qazaqstan halyqaralyq kınofestıvalderdiń turaqty qatysýshysy.
Bul joly tańǵy shyq elinde ótip jatqan 27-shi Pýsan halyqaralyq kınofestıvalinde Farhat Sháripovtyń «Sqema» fılmi eń úzdik azıalyq fılm ataǵyna talasady. Tanymal baıqaýda qazylar alqasy aktrısa Janar Aıjanovanyń jumysyna joǵary baǵa berdi, dep habarlaıdy Almaty-akshamy.kz Qazaqtv.com-ǵa silteme jasap.
Ol eń úzdik áıel róline úmitkerlerdiń bestigine endi. Aktrısanyń aıtýynsha, mundaı bedeldi kınoforýmǵa qatysýdyń ózi jeńis.
«Kınoǵa keshe ǵana kelgenmin, áli 10 jyl bolǵan joq. 6-7 jyldyń ishinde kózge iligip kelip, úzdikterdiń qataryna kirgen mende arman joq. Sondyqtan da jastarymyzǵa bizdiń jolymyzdy bersin, bizden ári qaraı asyp ketsin, festıváldardan qalmasyn, júldeli orynǵa ıe bolsyn», - dedi ánshi, aktrısa Janar Aıjanova.
Kınofestıvalge rejıser Darına Manapova da qatysýda. Bul jerde onyń sheteldik áriptesterimen birlese túsirgen fılminiń kórsetilimi bolady. Darınanyń kartınalary burynnan belgili bolǵanymen, ol úshin Pýsan kınoakademıasynda oqý - jańa jetistikterge aparatyn jol.
«Men munda 10 adamnan qurylǵan komandamen birge fılm túsirip jatyrmyn. Menimen birge 3 rejıser 10 kún boıy bir qysqametrajdy fılmdi túsiremiz. Onyń aldynda bir aılyq óndiris aldyndaǵy daıyndyq bar. Bul - shyn máninde, biregeı baǵdarlama, óıtkeni, meniń oıymsha, Azıada balamasy joq. Bizben kúnde sóılesetin jáne bul sırek kezdesetin joǵary sanatty mamandardan, tálimgerlerden keńes alýǵa úlken múmkindik bar», - deıdi rejıser Darına Manapova.