Pákistanda 17 jastaǵy Zaın Alı esimdi jasóspirimge óz otbasynyń múshelerin atyp óltirgeni úshin 100 jylǵa bas bostandyǵynan aıyrý jazasy taǵaıyndaldy, dep habarlaıdy Aqshamnews.kz tilshisi.
Qandy oqıǵa 2021 jyly Lahor qalasynyń Kahna aýdanynda bolǵan. Ol kezde aıyptalýshy nebári 14 jasta edi. Tergeý derekterine sáıkes, jasóspirim kompúterlik PUBG oıynyna qatty áýestenip ketken.
Anasy oıynǵa táýeldiligi úshin ulyna eskertý jasaǵan soń, jasóspirim myltyq alyp, 45 jastaǵy anasyn, 20 jastaǵy aǵasy Taımýrdy, 15 jastaǵy ápkesi Mahnýrdy jáne 10 jastaǵy qaryndasy Djannatty atyp tastaǵan.
Lahor soty árbir qylmys úshin 25 jyldan, jalpy 100 jylǵa bas bostandyǵynan aıyrýǵa úkim shyǵardy. Sot onyń jasyn eskerip, ólim jazasyn qoldanbady.
İs barysynda qylmysqa basty sebep retinde kompúterlik oıynǵa táýeldilik kórsetildi.