Almatyda qala ákimi Darhan Satybaldynyń tóraǵalyǵymen, Qalalyq ardagerler keńesiniń prezıdıýmy músheleriniń qatysýymen Qarttar kúnine oraı kezdesý ótti, - dep habarlaıdy Aqshamnews.kz tilshisi.
Ákim ardagerlerdi merekemen quttyqtap, olardyń eńbegine, tájirıbesine jáne qundylyqtarǵa adaldyǵyna zor rızashylyǵyn bildirdi.
«Bizdiń qoǵamda aǵa býynǵa degen shynaıy qurmet – jaı ǵana dástúr emes, mádenıetimiz ben ulttyq sanamyzdyń mańyzdy bóligi», – dedi Darhan Satybaldy.
Ákimniń aıtýynsha, ardagerler – baǵa jetpes ómirlik tájirıbeniń ıeleri, olar rýhynyń myqtylyǵymen úlgi bolatyn jandar.
«Sizderdiń eńbek pen tózimderińizdiń jáne senimderińizdiń arqasynda Almaty da, búkil Qazaqstan da búgin maqtan tutar deńgeıge jetti. Biz sizder bastaǵan isti jalǵastyryp, jetken jetistikti eselep, jańa damý kókjıegin ashyp kelemiz», – dep atap ótti qala basshysy.
Darhan Satybaldy qarttardy áleýmettik qoldaýǵa arnalǵan is-sharalar týraly keńinen aıtty. 2022 jyldan beri Almatyda «Belsendi uzaq ómir» jobasy tabysty júzege asýda. Onyń aıasynda qurylǵan Belsendi uzaq ómir súrý ortalyǵy jylyna 500 myńǵa deıin qyzmet kórsetedi.
Sonymen qatar, «Altyn jas» baǵdarlamasy jumys istep tur. Ol zeınetkerlerge úsh jyl merzimge jumysqa ornalasýǵa múmkindik beredi. Jalaqynyń bir bóligi jergilikti búdjet esebinen tólenedi. Osynyń arqasynda 1 myńnan astam adam turaqty jumysqa ornalasty.
Qalalyq ardagerler keńesin qoldaý úshin İshki saıasat basqarmasy arqyly úsh jyldyq joba júzege asyrylýda, sondaı-aq qyzmettik avtokólik máselesi sheshildi. Myńǵa jýyq qarıa sanatorıı-kýrorttyq emdelýge múmkindik aldy.
Ákim qart turǵyndardy áleýmettik jáne medısınalyq qyzmetpen sapaly qamtamasyz etý basty mindet ekenin atap ótti.
«Ardagerlerimizdi qoldaý, olarǵa laıyqty ómir súrý jaǵdaıyn jasaý – qoǵamdaǵy abyroıly ornyn qamtamasyz etý – bizdiń qasıetti boryshymyz», – dedi Darhan Satybaldy.
Megapolıs basshysy jaýapty basqarmalar men aýdan ákimderine Qarttar aıynyń aıasynda mádenı, sporttyq jáne bilim berý is-sharalaryn kúsheıtýdi, Ardagerler keńesimen ózara is-qımyldy nyǵaıtýdy tapsyrdy.