Nurlan Ábdirahym Almaty qalasy ákiminiń orynbasary qyzmetine kiristi, - dep habarlaıdy Aqshamnews.kz tilshisi. Ol bul laýazymda densaýlyq saqtaý, jumyspen qamtý jáne áleýmettik baǵdarlamalar salalaryna jetekshilik etedi.
Jańa qyzmetke deıin Nurlan Ábdirahym 2023 jyldyń sáýirinen bastap Almaty oblysy ákiminiń birinshi orynbasary bolyp jumys istegen.
Ábdirahym «Qaınar» ýnıversıtetin jáne Qazaqstan Respýblıkasy Prezıdenti janyndaǵy Memlekettik basqarý akademıasynyń Memlekettik saıasat ulttyq mektebin támamdaǵan. Bilimi boıynsha zańger, sondaı-aq saıasattaný salasynda áleýmettik ǵylymdar magıstri dárejesine ıe.
Eńbek jolyn 2001 jyly «Astanaenergoservıs» ashyq aksıonerlik qoǵamynda abonenttik ýchaske baqylaýshysy retinde bastaǵan. Keıin QR Ádilet mınıstrliginde túrli laýazymdarda qyzmet atqaryp, jetekshi mamannan departament dırektoryna deıin kóterilgen, sondaı-aq Zıatkerlik menshik komıtetiniń tóraǵasy bolǵan.
Sonymen qatar ol QR Prezıdenti Ákimshiliginde memlekettik ınspektor jáne bólim meńgerýshisiniń orynbasary qyzmetterin atqarǵan. Memlekettik qyzmettegi eńbegi úshin «Qurmet» ordenimen jáne mereıtoılyq medaldarmen marapattalǵan.