Tek resmı aqparat kózderine senýge shaqyrady.
Bas prokýrordyń orynbasary Jandos Ómirálıev Qazaqstan azamattaryna úndeý joldady, dep habarlaıdy Almaty-akshamy.kz.
Jandos Ómirálıev otandyq aqparattyq keńistikte jáne áleýmettik medıada túrli taqyryptar boıynsha kórineý jalǵan aqparat taratý jaǵdaılary jıilep ketkenin aıtty.
Onyń aıtýynsha, jelidegi keıbir blogerlerdiń arandatýshylyq málimdemeleri paıdalanýshylardyń ulttyq arazdyqty týdyratyn belgileri bar pikirlerin jarıalaýǵa negiz bolady.
«Naqty azamattardyń ar-namysy men qadir-qasıetine nuqsan keltiretin, sondaı-aq birqatar tanymal tulǵany ustaý jáne qylmystyq jaýapkershilikke tartý týraly jalǵan habarlamalar tarady. Mundaı jalǵan aqparatty ornalastyratyn blogerler qasaqana, óz múddeleri úshin jáne úshinshi tulǵalardyń múddeleri úshin áreket etedi. Olardyń maqsaty - jeke baıytý jáne qarajatty bopsalaý arqyly materıaldyq paıda alý. Ulttyq arazdyqty qozdyrýǵa, qorqytýǵa, kórineý jalǵan aqparat taratýǵa baǵyttalǵan is-áreketter Qazaqstan Respýblıkasy Qylmystyq kodeksiniń 174, 194 jáne 274-baptary boıynsha qylmystyq jaýaptylyqqa ákep soǵady», - dep qosty Bas prokýrordyń orynbasary.
Osyǵan baılanysty, Qazaqstan Respýblıkasynyń Bas prokýratýrasy el azamattaryn, buqaralyq aqparat quraldarynyń ókilderin, áleýmettik jelilerdiń paıdalanýshylaryn zańnamany buljytpaı saqtaýǵa jáne joǵaryda keltirilgen kez kelgen quqyq buzýshylyqtardyń jasalýyna jol bermeýge, arandatýshylyqqa boı bermeýge jáne tek resmı aqparat kózderine senýge shaqyrady.