2021 jyldyń qyrkúıek aıynan bastap.
QR BǴM-ne vedimistik baǵynyshty joǵary oqý oryndary oqytýshylarynyń jalaqysy 2021 jyldyń qyrkúıeginen bastap artady, dep habarlaıdy Almaty-akshamy.kz
Mınıstrliktiń málimetine sáıkes, endi JOO oqytýshysy aı saıyn keminde 200 myń teńge alatyn bolady. Aǵa oqytýshynyń eńbekaqysy keminde 230 myń teńgeni qurap, qaýymdastyrylǵan profesor – 260 myń teńge, profesor – 350 myń teńge (ulttyq joǵary oqý oryndarynda – 400 myń teńge) alýy tıis.
«Bul sheshim el Prezıdenti Q.Toqaevtyń JOO oqytýshylarynyń jalaqysyn arttyrý týraly tapsyrmasyn oryndaý aıasynda qabyldandy. Shtattaǵy oqytýshylarǵa mınımaldy jalaqy mólsherin belgileý týraly tıisti buıryqqa bilim jáne ǵylym mınıstri Asqat Aımaǵambetov qol qoıdy», – delingen mınıstrlik taratqan aqparatta.
Vedomstvo basshysynyń sózine qaraǵanda, oqytýshylardyń jalaqysy kóterilgenimen, olardyń oqý júktemesi tómendetiledi. Bul muǵalimderdiń ǵylymı qyzmetpen aınalysýlaryna múmkindik pen ýaqyttyń jetkilikti bolýy úshin jasalyp jatyr.
«Biz josparly túrde oqytýshylar úshin jaıly jaǵdaı jasap, eńbekaqyny jáne pedagogterdiń mártebesin arttyryp jatyrmyz. Joo oqytýshylarynyń jalaqysy da joǵarylaıtyn bolady. Eger biz bilimniń joǵary deńgeıde bolýyn qalasaq, muǵalimderge laıyqty jalaqy tóleý kerek ekenin túsinýimiz kerek. Bul rette biz joǵary oqý oryndary tarapynan sapaly jumysty, al oqytýshylardan oqý prosesine asqan jaýapkershilikpen qaraýdy talap etemiz. Buǵan deıin Ulttyq qoǵamdyq senim keńesiniń otyrysynda Memleket basshysy joo oqytýshylarynyń jalaqysyn kóterýdi tapsyrǵan bolatyn. BǴM-ge vedimistik baǵynyshty joo oqytýshylarynyń jalaqysy 2019 jyldyń qyrkúıeginde 20%-ke, 2020 jyldyń qyrkúıeginde taǵy 20%-ǵa ósti. Endi shtattaǵy oqytýshylardyń mınımaldy jalaqysy aı saıyn 200 myń teńgeni quraıdy. Sonymen qatar ár ýnıversıtet basqa da yntalandyrý tólemderin belgilep, oqytýshylardyń belgili bir jetistikteri úshin qosymshaaqy tóleı alady. Joǵary oqý oryndarynyń dırektorlar keńesi bul máseleni erekshe baqylaýda ustaýy qajet», – dep atap ótti Qazaqstan Respýblıkasynyń bilim jáne ǵylym vıse-mınıstri Qýanysh Erǵalıev.
Pedagogıkalyq júktemege keletin bolsaq, endi bir stavkanyń maksımaldy kólemi bir oqý jylynda 680 saǵattan aspaıdy. Aıta ketken jón, buryn eń tómengi jalaqy men saǵattyq júktemelerge qoıylatyn talaptar zańmen rettelmegen.