Osydan bir jyl buryn ótken kezekten tys prezıdent saılaýynda Qasym-Jomart Toqaevqa saılaýshylardyń 80 paıyzy daýys berdi.
Bul kórsetkish halyqtyń Prezıdentke degen senimi joǵary ekenin aıqyn ańǵartty. Memleket basshysy 2019 jyly júzege asyra bastaǵan aýqymdy ári jan-jaqty reformalar ol qaıta saılanǵannan keıin de dáıekti túrde jalǵasyn tapty.
Prezıdent saılaýy jańa saıası naýqandar kezeńine jol ashty. Sonyń nátıjesinde Parlamenttiń qos palatasynyń jáne máslıhattyń saılaýy ótip, olardyń quramy edáýir jańardy.
Eki apta buryn Qazaqstanda alǵash ret aýdan jáne oblystyq mańyzy bar qala ákimderiniń saılaýy boldy.
Osylaısha, elimizdiń saıası júıesin demokratıalyq jolmen ózgertý úderisi úzdiksiz jalǵasyp keledi.
Prezıdent Qasym-Jomart Toqaevtyń strategıalyq baǵdary Qazaqstan qoǵamynyń barlyq salasyn qanattastyra reformalaýǵa baǵyttalǵan.
Sondyqtan Prezıdent óziniń qyrkúıektegi Joldaýynda elimizdiń jańa ekonomıkalyq modelge kóshetinin jarıalady. Bul qadam ekonomıkany odan ári monopolıasyzdandyrý men ártaraptandyrýdy, ónerkásipti, aýyl sharýashylyǵyn, kólik pen logıstıkany, qarjy salasyn damytýdy, shaǵyn jáne orta bızneske júıeli qoldaý kórsetýdi kózdeıdi.
Saıası jáne ekonomıkalyq reformalarmen qatar áleýmettik-gýmanıtarlyq salada da mańyzdy reformalar júzege asyrylady. Ondaǵy maqsat – bilim berý, ǵylym jáne mádenıet salasyn damytý arqyly ulttyń jańa sapasyn qalyptastyrý.
Prezıdenttiń saılaý aldyndaǵy tuǵyrnamasynda aıtylǵan basty bastamalar bıyl júzege asyryla bastady. Onyń qatarynda «Ulttyq qor – balalarǵa» jobasy, «Aýyl amanaty» baǵdarlamasy, zańsyz jolmen alynǵan jáne shetelge shyǵarylǵan aktıvterdi elge qaıtarý sıaqty bastamalar bar.
Jalpy, Prezıdent strategıasynyń barlyq baǵyty – saıasat, ekonomıka jáne ıdeologıa úsheýi birikkende elimizdi júıeli túrde jańǵyrtýdy kózdeıtin birtutas baǵdarlamany quraıdy.