Sıeze kóptegen salmaqty oı, salıqaly pikir aıtyldy.
Memleket basshysy Qasym-Jomart Toqaevtyń Álemdik jáne dástúrli dinder kóshbasshylarynyń VII seziniń jabylý rásiminde sóılegen sózi jarıalandy, - dep habarlaıdy Almaty-akshamy.kz Aqordaǵa silteme jasap.
«Asa qadirli meımandar! Qurmetti Sezge qatysýshylar! Qazaq jeri eki kúnnen beri túrli mádenıetterdiń syndarly suhbat ortalyǵyna aınaldy. Dúnıe júzindegi bedeldi dinbasylar bir shańyraqtyń astyna jınaldy.
Sizder barsha adamzattyń kúsh-jigerin ortaq múddege jumyldyrý úshin álemniń ár túkpirinen kelip otyrsyzdar. Osynyń ózi dinaralyq kelisim men yntymaqtastyqtyń qanshalyqty mańyzdy ekenin kórsetedi. Shyn máninde, bárimizdiń maqsatymyz – bir. Bul – órkenıetter úndestigin ornatý jáne beıbitshilik pen turaqtylyqty nyǵaıtý.
Sıeze kóptegen salmaqty oı, salıqaly pikir aıtyldy. Onyń bári bizdiń úılesimdi álem qurý jolyndaǵy is-áreketimizge oń yqpalyn tıgizedi dep sanaımyn. Men alqaly jıynǵa arnaıy kelgen álemdik deńgeıdegi rýhanı kóshbasshylarǵa zor alǵys aıtamyn.
Sondaı-aq, bizdiń bastamamyzǵa qoldaý kórsetken saıasatkerler men halyqaralyq uıym ókilderine shynaıy rızashylyǵymdy bildiremin. Forýmdy ótkizýge belsene atsalysqan dıplomattarǵa, volonterlerge, jýrnalıser men basqa da azamattarǵa raqmetimdi aıtqym keledi.
Osy oraıda, asa qadirli Rım Papasy Fransıskke elimizge tarıhı saparmen kelgeni úshin Qazaqstan halqynyń jáne jeke óz atymnan taǵy da shynaıy alǵys bildiremin. Sez jumysyna ózińizdiń belsene qatysýyńyz – biz úshin zor mártebe. Sizdiń álem jurtshylyǵyna arnaǵan úndeýińiz jer júzindegi mıllıondaǵan adamǵa úmit pen senim syılaǵany anyq», dedi memleket basshysy.