2025 jylǵy 1 maýsymnan bastap Prezıdenttik jastar kadr rezervine kezekti irikteý bastaldy. Bul – daryndy, bastamashyl jáne jańasha oılaıtyn jastardy memlekettik basqarý isine tartýǵa baǵyttalǵan strategıalyq bastama. Joba Memleket basshysynyń bastamasymen júzege asyrylyp, búgingi kúni elimizdiń kadr saıasatynyń mańyzdy elementine aınaldy.
Bıylǵy irikteýdiń ereksheligi qandaı?
Tórtinshi irikteýdiń basty jańalyǵy – salalyq proporsıonaldy tásildiń engizilýi. Árbir salalyq baǵyt boıynsha naqty kvotalar belgilenip, úmitkerler tek óz salasynda ǵana básekege túsedi. Bul tásil rezervtiń memlekettik qajettilikterge saı teńgerimdi qalyptasýyn qamtamasyz etedi.
Qatysý talaptary qandaı?
Úmitkerlerge qoıylatyn talaptar ózgerissiz qaldy:
• jasy – 35-ten aspaýy tıis;
• joǵary bilimi bolýy kerek;
• keminde 5 jyl jumys tájirıbesi bolýy qajet;
• qazaq tilin B1 deńgeıinen tómen emes deńgeıde meńgerýi tıis.
Qatysýǵa jiberilmeıdi:
• Prezıdent taǵaıyndaǵan tulǵalar;
• saıası memlekettik qyzmetshiler;
• «A» korpýsynyń ákimshilik memlekettik qyzmetshileri;
• Prezıdenttik jastar kadr rezerviniń qazirgi músheleri.
İrikteý qalaı ótedi?
2019 jylǵy 27 tamyzdaǵy №141 Prezıdent Jarlyǵyna sáıkes, irikteý alty kezeńnen turady jáne 2025 jyldyń qazanyna deıin jalǵasady.
I kezeń (1–30 maýsym)
Qujattardy qabyldaý arnaıy aqparattyq júıe arqyly onlaın rejımde júzege asyrylady.
II kezeń (2–3, 9–10 tamyz)
Mátindik jáne sandyq aqparatpen jumys isteý qabiletin baǵalaý.
Barlyq talapqa saı úmitkerler mátinmen jumys isteý testinen ótedi. Joǵary upaı jınaǵan úmitkerlerdiń 50%-y ǵana sandyq aqparat boıynsha testke jiberiledi.
Nátıjesinde – ár baǵyt boıynsha 100-den aspaıtyn, jalpy 600 úzdik úmitker kelesi kezeńge ótedi.
III kezeń (16–17 tamyz)
Salalyq baǵytqa baılanysty naqty jaǵdaılardy sheshýge arnalǵan esse jazý. Bul kezeń onlaın formatta ótedi.
Qorytyndy boıynsha 300 úmitker kelesi kezeńge joldama alady.
IV kezeń
Eki bloktan turady:
• Assessment-ortalyq (22–28 tamyz) — Memlekettik basqarý akademıasy bazasynda offlaın ótedi. Úmitkerlerdiń kóshbasshylyq, analıtıkalyq oılaý, proaktıvtilik jáne basqa da basqarýshylyq qabiletteri baǵalanady.
• Quzyretter boıynsha suhbat (23–28 qyrkúıek) — kásibı HR-mamandarmen ótkiziledi. Úmitkerdiń ishki motıvasıasy men qundylyqtyq baǵdarlary anyqtalady.
Bul kezeńniń qorytyndysy boıynsha 150 qatysýshy tańdalyp alynady.
V kezeń (8–15 qazan)
Saraptamalyq komısıamen suhbat. Nátıjesinde 100-den aspaıtyn úmitkerden turatyn tizim Ulttyq komısıanyń qaraýyna usynylady.
VI kezeń (25 qazanǵa deıin)
Ulttyq komısıanyń otyrysy ótip, eń úzdik 50 úmitker Prezıdenttik jastar kadr rezervine qabyldanady.
Jastarǵa úndeý
Búgingi tańda elimiz úlken ózgerister men jańa syn-qaterler aldynda tur. Mundaı kezeńde kásibı, progresıvti jáne nátıjege baǵyttalǵan memlekettik qyzmetshilerdiń jańa býynyn qalyptastyrý erekshe mańyzdy. Memlekettik apparatqa – bilimdi, adal ári eńbekqor jastar qajet. Olar elge qyzmet etýdi óz boryshy sanaıdy.
Prezıdenttik jastar kadr rezervi – bul jaı ǵana mansap múmkindigi emes. Bul – el taǵdyryna áser etý, úlken ózgeristerdiń bir bólshegi bolý, halyq ıgiligi úshin eńbek etý múmkindigi.
Qurmetti jas azamattar!
Eger sizde kúsh-jiger, elge degen janashyrlyq jáne ózgeristerge umtylys bolsa – osy múmkindikti jiberip almańyz! İrikteýge qatysyńyz, elimizdiń bolashaǵyn birge qalyptastyraıyq!
Qazaqstan bolashaǵy – sizderdiń qoldaryńyzda!