Qazaqstan Prezıdentiniń keńesshisi - baspasóz hatshysy Rýslan Jeldibaı Halyqaralyq dzúdo federasıasynyń (IJF) Jańa tehnologıalar jáne joǵary nátıjeler jónindegi komısıasynyń dırektory qyzmetine taǵaıyndaldy, - dep habarlaıdy Aqshamnews.kz tilshisi Massaget.kz-ke silteme jasap.
Rýslan Jeldibaı bul qyzmetti qosa atqaratyn bolady. Aıta keteıik, bul - qoǵamdyq negizdegi jumys (ıaǵnı, eńbekaqy qarastyrylmaǵan).
Komısıa zamanaýı tehnologıalardy engizý, olardy sportshylardyń, álemdik dzúdo qaýymdastyǵynyń múddesine saı tıimdi ári etıkalyq turǵyda paıdalaný máselelerimen aınalysady. Erekshe kóńil ınovasıalarǵa, yntymaqtastyqqa jáne zaman talabyna saı turaqty damýǵa bólinedi.
IJF ókilderi Rýslan Jeldibaıdyń tájirıbesi men quzyrettiligi komısıa jumysyna eleýli úles qosyp, dzúdony jahandyq qozǵalys retinde ilgeriletýge yqpal etetinine senim bildirdi.
Rýslan Jeldibaı - 2025 jylǵy 17 aqpannan beri Qazaqstan Prezıdentiniń keńesshisi - baspasóz hatshysy. Buǵan deıin Prezıdenttiń ishki saıasat jáne komýnıkasıalar jónindegi kómekshisi qyzmetin atqarǵan. 2023 jylǵy qańtar men qyrkúıek aralyǵynda Prezıdent Ákimshiligi basshysynyń orynbasary - Prezıdenttiń baspasóz hatshysy bolǵan.