Prezıdent: «Eń bastysy – tutynýshylar úshin avtomobılder men aýyl sharýashylyǵy tehnıkasynyń qoljetimdiligin arttyrý»
QR Prezıdenti Qasym-Jomart Toqaev ýtıldik alym mólsherlemesine qatysty pikir bildirdi, dep habarlaıdy Almaty-akshamy.kz QazAqparatqa silteme jasap.
«Ýtıldik alym boıynsha biz sheshim qabyldadyq. Barlyq qarajat memleketke túsedi. Endi stavkalardyń mólsherin anyqtaý qajet. Jumys toby bul máseleni belsendi talqylaýda. Birden aıta ketý kerek, ýtıldik alymdy biz qaıta qaraımyz. Biraq shekten shyǵýdan aýlaq bolý kerek. Avtoónerkásipti damytýǵa jumsalǵan aqshany jelge shashyp, ımporttyq eski kólikter aǵynyna óz naryǵymyzdy ashýǵa bolmaıdy», - dedi Memleket basshysy.
Sondaı-aq, bul saladaǵy reforma qaıta óńdeý nemese tirkeý jarnasyn ózgertý úshin ǵana qolǵa alynbaǵanyn eske saldy.
«Eń bastysy – tutynýshylar úshin avtomobılder men aýyl sharýashylyǵy tehnıkasynyń qoljetimdiligin arttyrý. Men óndirýshiler men dıstrıbútorlardyń tıisti reaksıasyn kútemin. Úkimettiń aldyn ala daıyndaǵan baıandamasy onyń durys jolda ekenin kórsetip otyr»,- dedi Prezıdent.
Eske salsaq, búgingi otyrysta QR Premer-Mınıstri Álıhan Smaıylov ýtıldik alymnyń mólsherlemesi tómendetiletinin aıtty.