Kásipkerlikti damytýdyń negizgi baǵyttaryna nazar aýdaryldy.
Prezıdent «Atameken» UKP prezıdıýmynyń tóraǵasy Raıymbek Batalovty qabyldady, dep habarlaıdy Almaty-akshamy.kz Aqordanyń baspasóz qyzmetine silteme jasap.
Memleket basshysyna otandyq kásipkerlikti qoldaý jáne damytý jóninde atqarylyp jatqan jumystar, memleket pen bıznes arasyndaǵy yntymaqtastyq, Ulttyq kásipkerler palatasyn transformasıalaýdyń negizgi baǵyttary týraly baıandaldy.
Raıymbek Batalov palatanyń fýnksıasyna jatpaıtyn qyzmetterge taldaý jasalyp, qysqartylǵanyn, olardyń básekelik ortaǵa berilgenin, sondaı-aq Ulttyq kásipkerler palatasynyń búdjet baǵdarlamasyna táýeldiligi túbegeıli azaıǵanyn jetkizdi.
Kezdesý barysynda elimizdegi kásipkerlikti damytýdyń negizgi baǵyttaryna erekshe nazar aýdaryldy.
Joǵary áleýmettik jaýapkershilik, adaldyq, salyq adaldyǵy, ekologıalyq talaptardy saqtaý jáne basqa mańyzdy qaǵıdattardy berik ustanatyn kásipkerlerdiń jańa býyny paıda bolý úshin jaǵdaı jasaý qajettigi aıtyldy.
Qazirgi ýaqytta palata meılinshe jedel sheshýdi qajet etetin jáne strategıalyq basymdyqqa ıe máselelerdi anyqtaý úshin tereń taldaý júrgizip jatyr.
Atalǵan túıtkilderdiń Úkimetpen jáne ákimdiktermen tyǵyz seriktestikte sheshilýi ekonomıkany tıimdi ártaraptandyrýǵa, jańa ekonomıkalyq saıasatty júzege asyrýǵa jáne qolaıly bıznes ahýal qalyptastyrýǵa septigin tıgizedi.
Prezıdent Ulttyq kásipkerler palatasynyń esebin tyńdap, strategıalyq sheshimder qabyldaý kezinde bıznestiń múddesin eskerý mańyzdy ekenin, sondaı-aq otandyq kásipkerlikti damytýdy yntalandyrý úshin usynylǵan sharalar men «Atamekendi» transformasıalaý tásilderiniń ózektiligin atap ótti.