Prezıdentke elimizdiń bıylǵy 6 aıdaǵy áleýmettik-ekonomıkalyq damý qorytyndysy, sondaı-aq Mańǵystaý atom energetıkalyq kombınatynda (MAEK) jáne Atyraý munaı óńdeý zaýytynda (AMÓZ) bolǵan apattardyń sebepterin tekserý nátıjeleri jóninde baıandaldy.
Álıhan Smaıylovtyń aıtýynsha, batys óńiriniń energetıka júıesiniń jaı-kúıine jasalǵan aýqymdy taldaý nátıjesinde energetıka kásiporyndarynyń jumysynda birqatar kemshilik jiberilgeni anyqtaldy. Budan bólek, Energetıka mınıstrliginiń, «KEGOC» AQ, «MAEK» JSHS jáne «QazMunaıGaz» UK» AQ jumysynda olqylyqtar bar ekeni málim boldy, dep habarlaıdy Almaty-akshamy.kz Aqordaǵa silteme jasap.
«QazMunaıGaz» UK» AQ basqarma tóraǵasy Maǵzum Myrzaǵalıevke munaı óńdeý zaýytynyń qaýipsiz jáne turaqty jumysyn qamtamasyz etý sharalaryn ýaqtyly júzege asyrmaǵany úshin sógis beriledi.
Budan bólek, batys energıa torabynyń qaýipsizdigine tıisti deńgeıde baqylaý jasamaǵany úshin Energetıka vıse-mınıstri Jandos Nurmaǵanbetovke sógis jarıalaý jóninde sheshim qabyldandy. Sondaı-aq «MAEK» JSHS, AMÓZ, «KEGOC» AQ basshylary men laýazymdy tulǵalaryna qatysty ákimshilik sıpattaǵy sharalar qoldanylady.
Úkimet keleshekte mundaı daǵdarys jaǵdaılaryna jol bermeý úshin Mańǵystaý atom energetıkalyq kombınatyna jańǵyrtý jáne kúrdeli jóndeý júrgizý, batys energetıkalyq aımaǵyn kúsheıtý, Atyraý munaı óńdeý zaýytyn syrtqy elektr qýatymen turaqty qamtamasyz etý jáne sol jerde ózin-ózi energıamen qamtamasyz etetin stansa salý, batys aımaǵyn Qazaqstannyń biryńǵaı elektrenergetıkalyq júıesine qosý jumystaryn jáne basqa da birqatar shuǵyl jáne júıeli sharalardy júzege asyrady.
Sonymen qatar Memleket basshysyna vegetasıalyq kezeńi sý tapshylyǵy jaǵdaıynda ótip jatqan ońtústik óńirlerdi sýmen qamtamasyz etý máselesi týraly málimet berildi.
Osyǵan baılanysty Úkimet pen jergilikti atqarýshy organdar qajetti sharalar qabyldap jatyr.
Atap aıtqanda, sýmen qamtamasyz etý úshin sýarmaly aýyl sharýashylyǵy daqyldarynyń qaısysyna basymdyq beriletini anyqtalady, sýaınalym ádisi qoldanylady. Budan bólek, sý únemdeý tehnologıasyn engizý jumystary belsendi júzege asyrylýda.
Arnalardaǵy sý shyǵynyn azaıtý jáne jınaqtalatyn sý mólsherin kóbeıtý úshin gıdrotehnıkalyq qurylystarǵa kúrdeli jóndeý jumystary júrgizilip jatyr.
Sondaı-aq Premer-mınıstr Álıhan Smaıylov «Tarıfti ınvestısıaǵa aıyrbastaý» baǵdarlamasyn júzege asyrýǵa, komýnaldyq ınfraqurylymdy jańǵyrtýǵa jáne kıikter popýlásıasyn ornyqty basqarýǵa qatysty qabyldanyp jatqan sharalar jóninde baıandady.