Armıamyzdyń aıbyny asqaqtaı bersin!
Qazaqstan Prezıdenti Qasym-Jomart Toqaev qazaqstandyqtardy Otan qorǵaýshylar kúnimen quttyqtady, dep habarlaıdy Almaty-akshamy.kz Aqordanyń resmı saıtyna silteme jasap.
«Sizderdi Otan qorǵaýshylar kúnimen shyn júrekten quttyqtaımyn! Bul – tek áskerı qyzmetshiler úshin ǵana emes, barshamyzǵa ortaq qasterli mereke. Elin qorǵaý – árbir azamattyń perzenttik paryzy. Týǵan jerge degen sheksiz súıispenshiliktiń jarqyn kórinisi.
Memleketimizdiń qorǵanys qabiletin arttyrý – negizgi strategıalyq maqsatymyzdyń biri. Qazaqstan armıasy kez kelgen jaǵdaıda memleketimizdi qorǵaýǵa daıyn bolýy kerek. Qarýly Kúshterimiz elimizdiń egemendigi men tutastyǵynyń jáne halqymyzdyń myzǵymas birligi men jarqyn bolashaǵynyń kepili bolyp qala beredi.
Búginde jaýyngerlerimiz batyr babalarymyzdyń dańqty jolyn jalǵastyryp, el tynyshtyǵyn qyraǵylyqpen kúzetip tur. Olardyń qaýipsizdikti qamtamasyz etý jolyndaǵy qaltqysyz qyzmeti – óskeleń urpaqqa árdaıym úlgi-ónege.
Ózderine júktelgen mindetti minsiz atqaryp, antyna adaldyq tanytyp júrgen barlyq sarbazdarǵa shynaıy rızashylyǵymdy bildiremin. Armıamyzdyń aıbyny asqaqtaı bersin! Elimizdiń irgesi árdaıym berik bolsyn!
Áskerı qyzmetshilerge, ardagerlerge jáne barsha otandastarymyzǵa zor densaýlyq, qajymas qaırat pen baq-bereke tileımin!», - dedi Prezıdent.
