Atqarǵan jumystarynyń nátıjeleri týraly baıandaldy.
Memleket basshysy Qasym-Jomart Toqaev Qarjylyq monıtorıń agenttiginiń tóraǵasy Janat Elımanovty qabyldady, dep habarlaıdy Almaty-akshamy.kz Aqorda saıtyna silteme jasap.
Prezıdentke Qarjylyq monıtorıń agenttiginiń bıylǵy birinshi toqsanda atqarǵan jumystarynyń nátıjeleri týraly baıandaldy. Atap aıtqanda, 552 qylmystyq is qozǵalǵan. Olardyń jartysynan kóbi – aýyr jáne asa aýyr qylmystar. Uıymdasqan qylmystyq top qurý faktileri boıynsha 14 iske qatysty sotqa deıingi tergeý amaldary bastalǵan. Memleketke 62 mıllıard teńge kóleminde shyǵyn keltirilgen.
Janat Elımanovtyń aıtýynsha, 2021-2023 jyldarǵa arnalǵan Keshendi jospar aıasynda kóleńkeli ekonomıkanyń deńgeıin tómendetý úshin júıeli sharalar qabyldanyp jatyr. Keden salasynda 34 qylmystyq is qozǵaldy. Deklarasıaǵa engizilmegen taýarlardyń jalpy quny 10 mıllıard teńgeden asady.
Qasym-Jomart Toqaevqa munaı óńdeý zaýyttaryn jańǵyrtýǵa bólingen 20,5 mıllıard teńge qarjyny jymqyrý faktilerine qatysty qylmystyq ister boıynsha tergeý júrgizilip jatqany týraly málimet berildi.
Agenttik tóraǵasynyń aıtýynsha, qoǵamdaǵy áleýmettik máselelerdi sheshýge erekshe kóńil bólinedi. «Tarıf» jobasy aıasynda komýnaldyq qyzmetter salasyndaǵy tarıfterdiń negizsiz ósý derekterin anyqtaý jáne monopolıalardan aryltý jumystary jalǵasýda.
Mańǵystaý oblysynda suıytylǵan gazdy satý kezindegi alyp-satý belgileri boıynsha Energetıka mınıstrliginiń, oblys ákimdiginiń laýazymdy tulǵalaryna jáne elektrondy saýda alańdaryna qatysty is tergep-tekserilýde.
Prezıdenttiń tapsyrmasy aıasynda qarjyny Qazaqstannan tys jerlerge zańsyz jylystatýǵa qarsy jumystar júrgizilýde. Búginde 7 qylmystyq is tergelip jatyr jáne 28 mıllıon AQSH dollary buǵattalǵan.
Memleket basshysy Agenttiktiń qylmystyq jolmen alynǵan kiristerdi zańdastyrýǵa jáne kóleńkeli ekonomıkanyń deńgeıin tómendetýge qarsy is-qımyl jónindegi jumystarynyń mańyzdy ekenin erekshe atap ótip, Janat Elımanovqa bızneske qatysty júrgizilip jatqan barlyq qylmystyq isti tergep-tekserý kezinde zańdylyqtyń múltiksiz saqtalýyn qamtamasyz etýdi tapsyrdy. Prezıdenttiń pikirinshe, quqyq qorǵaý jáne baqylaýshy organdar kásipkerlerdiń ótinishterine jedel nazar aýdarýǵa jáne olardyń quqyǵyn shektemeýge tıis. Qasym-Jomart Toqaev shaǵyn jáne orta bızneske memleket tarapynan erekshe qoldaý qajet ekenin aıtty jáne bul jerde Qarjylyq monıtorıń agenttigi mańyzdy ról atqarady dep sanaıdy. Quqyq qorǵaý jáne baqylaýshy organdardyń ortaq mindeti – ekonomıkamyzdyń ornyqty damýyn qamtamasyz etý úshin elimizde qolaıly bıznes-orta qalyptastyrýǵa atsalysý.