Rekordtyq kórsetkish.
Almatyda júgirýden jartylaı marafon ótti. Tuńǵysh Prezıdent saıabaǵynan bastalǵan jarysqa 5 500 adam qatysyp, rekordtyq kórsetkish ornatty, dep habarlaıdy Almaty-akshamy.kz Almaty.tv silteme jasap.
Jelaıaqtar qala kóshelerimen júgirip ótip, ortalyq stadıonǵa deıin jetti. Dástúrge aınalǵan sporttyq sharanyń ashylý saltanatyna qala ákiminiń orynbasary Arman Qyryqbaev qatysyp, mundaı ıgi bastamalardyń qashanda qoldaýǵa ıe bolatynyn jetkizdi.
Júgirý alańynan jetkinshekter men jasy 80 jastaǵy egde kisilerdi de baıqaýǵa bolady. Bári de - sport pen salaýatty ómir saltyn janyna serik etkender. Olardyń qatarynda júgirýden túrli dárejedegi sport sheberleri, jeńil atletter jáne júgirýmen áýesqoı túrde aınalysatyndar bar.
Ál-Farabı dańǵyly boıynan bastalǵan marafon Abaı dańǵylyndaǵy ortalyq stadıonǵa deıin jalǵasty. Osy aralyqtaǵy joldar jabylyp, qoǵamdyq kólikter ýaqytsha toqtatyldy. Aınalasy bir saǵattyń ishinde alǵashqy 10 shaqyrymdy júgirip ótkender máre syzyǵyna kelip te úlgerdi.
Sońǵy kezderi Almaty marafonyna alys-jaqyn shet elden arnaıy keletinderdiń de qatary artqan. Uıymdastyrýshylar kópshilikti qyzyqtyrǵan sporttyq shara shamamen 5 jyldyń ishinde aýqymyn keńeıtti deıdi.
«Reseı, Qyrǵyzstan, Ózbekstannan ózge de túrli elden kelip jatyr. Búgin jarysqa 5 500 adam qatysyp otyr. Onyń ishinde teń jartysy 10 shaqyrymǵa, qalǵany 21 shaqyrymǵa júgirdi. Skandınavıalyq júris bar jáne densaýlyq ereksheligine baılanysty arbamen qatysatyn sportshylarda bar. Jarys óte qyzyqty ótip jatyr, qýanyshtymyz», – dedi uıymdastyrýshy Isa Qalqa.
10 shaqyrym joldy bárinen basyp ozyp, birinshi kelgen Denıs Stepanenko jeńimpaz atandy. Al áıelder arasynda Ekaterına Grısaı alǵashqy bolyp keldi. 21 shaqyrym júgirip ótkender 350-450 myń aqshalaı syılyqpen marapattaldy. Shara sońy konserttik baǵdarlamaǵa ulasty.