Mınıstr aldaǵy ýaqyttaǵy josparlary týraly aıtty.
Memleket basshysy Qasym-Jomart Toqaev Ekologıa, geologıa jáne tabıǵı resýrstar mınıstri Serikqalı Brekeshevti qabyldady, dep habarlaıdy Almaty-akshamy.kz Akorda.kz silteme jasap.
Qasym-Jomart Toqaevqa mınıstrliktiń aldaǵy ýaqyttaǵy josparlary jáne Prezıdenttiń halyqqa Joldaýynda bergen tapsyrmalarynyń oryndalýy týraly baıandaldy.
Atap aıtqanda, Serikqalı Brekeshev Memleket basshysyna Ulttyq geologıalyq qyzmet qurýǵa qatysty jumystar, «Mıneraldyq resýrstardyń ulttyq derekter banki» aqparattyq júıesiniń ázirlenýi jóninde málimet berdi.
Prezıdentke sý sharýashylyǵyn damytý jónindegi tapsyrmalarynyń oryndalý barysy týraly baıandaldy. Mınıstrdiń aıtýynsha, bes jyldyń ishinde sýarý jelisiniń keminde 120 arnasy qalpyna keltirilip, jalpy kólemi 1,7 mıllıard tekshe metr bolatyn jańadan toǵyz sý qoımasy salynady.
Qasym-Jomart Toqaev sý únemdeý tehnologıalaryn engizý isin yntalandyrý jáne sý salasyn sıfrlandyrý qajet ekenin atap ótti.
Kezdesý barysynda atmosferalyq aýanyń lastanýyn azaıtý baǵytynda qabyldanyp jatqan sharalarǵa erekshe mán berildi. Vedomstvo basshysynyń aıtýynsha, ekologıalyq jaǵdaıdy jaqsartý maqsatynda aımaqtar boıynsha jol kartalary bekitilip, «Jasyl Qazaqstan» ulttyq jobasy ázirlendi jáne kásiporyndarmen birqatar memorandýmǵa qol qoıyldy. Atalǵan qujattar qaldyqtardyń kólemin 20-dan 30 paıyzǵa qysqartýǵa múmkindik beredi.
Kezdesý sońynda Memleket basshysy jańadan taǵaıyndalǵan mınıstrge birqatar naqty tapsyrma berdi.