Prezıdent saltanatty rásimge qatysýshylardy qurylystyń bastalýymen quttyqtap, atalǵan jobanyń mańyzdylyǵyn atap ótti, dep habarlaıdy Almaty-akshamy.kz.
– Elimiz sońǵy 15 jylda bul salaǵa 35 mıllıard dollar ınvestısıa saldy. Lánúngan portynda qazaq-qytaı logıstıka ortalyǵyn qurdyq. Jańa temirjol baǵyttaryn ashtyq. «Qorǵas – Shyǵys qaqpasy» qurǵaq porty jumys isteı bastady. Kaspıı teńizinde zaman talabyna saı ınfraqurylym jasaldy. Osy sharalardy júzege asyrylyp jatqan jumystyń bir bóligi deýge bolady. Byltyr eki el arasynda temirjol arqyly 23 mıllıon tonna júk tasymaldandy. Bul – buryn-sońdy bolmaǵan kórsetkish. Bıyl birinshi toqsanda júk tranzıti 35 paıyzǵa artyp, 7 mıllıon tonnadan asty. Bizdiń yntymaqtastyǵymyz munymen shektelmeıdi. Alys-beristi odan ári damytý úshin qosymsha ınfraqurylym qajet. Sondyqtan qytaılyq áriptestermen birge Sıan qalasyndaǵy qurǵaq portta logıstıka ortalyǵyn salý kerek degen sheshim qabyldadyq. Bul hab Shensı aımaǵyn Qazaqstanmen, Ortalyq Azıamen baılanystyrady. Ári qaraı Eýropaǵa, Túrkıaǵa jáne Iranǵa jol ashady. Jobanyń tolyq iske qosylýy eki eldiń yntymaqtastyǵyna tyń serpin beredi dep senemin, – dedi Qasym-Jomart Toqaev.
Kelesi jyldan bastap qurǵaq port arqyly elektronıkalardy, kompúter bólshekterin, avtomobılder men avtobólshekterdi, toqyma buıymdaryn, kıim-keshek, aıaq kıim men aksesýarlardy, azyq-túlik jáne aýyl sharýashylyǵy ónimderin, qurylys ónimderi men qurylys materıaldaryn, sondaı-aq rýdalardy, metaldardy jáne hımıalyq ónimderdi tasymaldaý josparlanyp otyr.