Memleket basshysy Qasym-Jomart Toqaevqa Parlament Senatynyń VII sesıasy barysynda atqarylatyn jumys jospary týraly baıandaldy.
Sondaı-aq Prezıdenttiń Joldaýy men bergen tapsyrmalaryn iske asyrýǵa baǵyttalǵan birqatar zań toptamasynyń ázirlenip jatqany jóninde málimet berildi, dep habarlaıdy Almaty-akshamy.kz. Akorda.kz-ke silteme jasap.
QR Parlamenti Senatynyń tóraǵasy aldaǵy sesıada senatorlardyń Úkimetpen jáne Májilis depýtattarymen birlesip, áıelder men jastar úshin 30 paıyzdyq kvotanyń saqtalýyna qatysty zańnama boıynsha jumys isteıtinin aıtty. Sonymen qatar «Áleýmettik kodeks», «Ónerkásip saıasaty týraly», «Kásibı biliktilik týraly», «Jeke qosalqy sharýashylyqtar týraly» jáne basqa da zańdarǵa ózgertýler men tolyqtyrýlar engizý mindeti tur.
Máýlen Áshimbaevtyń aıtýynsha, senatorlardyń bastamasymen Prezıdent tapsyrmalaryn iske asyrýǵa baǵyttalǵan birqatar zań jobasy ázirlengen. Atap aıtqanda, «Adam quqyqtary jónindegi ýákil týraly» zań jobasy josparlanýda, sonymen qatar ǵylymı kadrlardyń jaǵdaıyn jaqsartý jáne olardyń áleýmettik qorǵalý kepildikteri týraly zańnamasyna, Salyq kodeksine ózgertýler engizý kózdelýde. Sondaı-aq jaıylymdyq jerlerdi basqarýdy jáne paıdalanýdy retteıtin birqatar túzetýler ázirlenip jatyr.
Qasym-Jomart Toqaev «Halyq únine qulaq asatyn memleket» tujyrymdamasyn iske asyrý aıasynda qabyldanatyn zań jobalaryn talqylaý jáne pysyqtaý jumystaryna azamattyq qoǵam ókilderi men sarapshylardy keńinen jumyldyrý qajettigin aıtty.
Kezdesý sońynda Prezıdent parlamenttik dıplomatıanyń áleýetin odan ári arttyrýǵa qatysty birqatar mindet júktedi.
Sonymen qatar Memleket basshysy 2022 jyly ótetin Álemdik jáne dástúrli dinder kóshbasshylarynyń VII sezine daıyndyqty bastaý týraly tapsyrma berdi.