Memleket basshysy Qasym-Jomart Toqaev VIII saılanǵan Qazaqstan Respýblıkasy Parlamentiniń birinshi sesıasynda saılaýǵa belsene qatysqan azamattarǵa alǵys aıttty, dep habarlaıdy Almaty-akshamy.kz.
«Reformalarymyz «Kúshti Prezıdent – yqpaldy Parlament – esep beretin Úkimet» qaǵıdasyna negizdeldi. Bul qaǵıda – memleketimizdiń basty tiregi.
Referendýmnan keıin Konstıtýsıanyń jańa talaptaryna saı bılik tarmaqtaryn túgel jańǵyrtýǵa kiristik. Halyqtyń da kópten kútkeni osy edi. Konstıtýsıalyq ózgeristerge sáıkes Prezıdent saılaýy, Senat, Májilis jáne máslıhattar saılaýy ótti.
Referendýmdy qosqanda bir jylǵa jýyq ýaqyttyń ishinde óte mańyzdy bes saıası naýqan ótkizildi. Onyń bári asa kúrdeli kezeńge tuspa-tus keldi. Qanshalyqty kúrdeli bolsa da, biz elimiz úshin óte qajet joldy qysqa merzim ishinde júrip óttik. Qazaqstannyń jańaryp, jańǵyra bastaǵanyna jurttyń kózi jetti», - dedi Prezıdent.
Memleket basshysy keshegi saılaýda partıalarmen qatar, kóptegen azamat bir mandatty okrýgten ózin-ózi usynǵanyn atap ótti.
«Osylaısha, halqymyz mańyzdy ózgeriske óz úlesin qosýǵa daıyn ekenin dáleldedi. Elimizde jańa azamattyq, saıası mádenıet qalyptasyp jatyr. Men saılaýǵa belsene qatysqan barsha azamatqa alǵys aıtamyn», - dedi Qasym Jomart Toqaev.
Aıta keteıik, elordada Memleket basshysy Qasym-Jomart Toqaevtyń qatysýymen VIII saılanǵan Qazaqstan Respýblıkasy Parlamentiniń birinshi sesıasy ótip jatyr.