QR Prezıdenti Qasym-Jomart Toqaev VIII saılanǵan Qazaqstan Respýblıkasy Parlamentiniń birinshi sesıasynda bir jyl ishinde elde bolǵan negizgi saıası ózgeristerge toqtaldy, dep habarlaıdy Almaty-akshamy.kz.
«Men bir jyl buryn osy ǵımaratta halyqqa joldaýymdy jarıaladym. Elimiz úshin asa mańyzdy sátte saıası jańǵyrý baǵdarlamasyn usyndym. Bastamalarymyz jurttyń shynaıy qoldaýyna ıe boldy. Oǵan byltyrǵy referendýmda aıqyn kóz jetkizdik. Biz táýekelge bel býyp, birden iske kiristik. Bir jyldyń ishinde aýqymdy jumys atqaryldy», - dedi Memleket basshysy.
Qasym-Jomart Toqaev konstıtýsıalyq reforma arqyly búkil júıeni ózgertetin qadamdar jasalǵanan eske saldy.
«Prezıdent jeti jylǵa bir ret qana saılanatyn boldy. Sondaı-aq, Parlamenttiń quzyreti men qyzmeti qaıta qaraldy. Depýtattardyń róli edáýir kúsheıdi. Konstıtýsıalyq Sot quryldy. Búkil sot júıesine túbegeıli reforma jasaý bastaldy. Adamnyń quqyqtary men bostandyqtaryn qorǵaýǵa qatysty jumys jańasha sıpat aldy. Azamattardyń saıası ómirge emin-erkin aralasýyna jol ashyldy», - dedi Prezıdent.
Aıta keteıik, elordada VIII saılanǵan Qazaqstan Respýblıkasy Parlamentiniń birinshi sesıasy ótip jatyr. Jıynǵa Memleket basshysy Qasym-Jomart Toqaev qatysýda.