Qasym-Jomart Toqaev Nýrlanbek Shakıevke iltıpat bildire otyryp, eki el arasyndaǵy qatynastardy damytý jáne parlamentaralyq baılanystardy nyǵaıtý mańyzdy ekenin atap ótti. Onyń aıtýynsha, Qyrǵyzstan – Qazaqstan úshin tatý kórshi, baýyrlas memleket jáne strategıalyq seriktes.
Kezdesý barysynda Memleket basshysy búginde qazaq-qyrǵyz qarym-qatynasy qarqyndy damyp kele jatqanyn, oǵan úkimetaralyq jáne parlamentaralyq deńgeıdegi ózara is-áreket yqpal etetinin atap ótti. Sondaı-aq ekijaqty saýda-ekonomıkalyq yntymaqtastyq jyldan-jylǵa nyǵaıyp kele jatqanyn jáne elderimiz arasyndaǵy taýar aınalymyn 2 mıllıard dollarǵa deıin jetkizý kózdelip otyrǵanyn aıtty.
Prezıdent qol jetkizilgen ýaǵdalastyqtar elderimiz arasyndaǵy yntymaqtastyqtyń kóptegen baǵytynyń damýyna tyń serpin beretinine senim bildirdi. Sondaı-aq Qazaqstan baýyrlas Qyrǵyzstanmen odaqtastyq qatynastardy jan-jaqty nyǵaıtýǵa nıetti ekenine nazar aýdardy.
Óz kezeginde Nýrlanbek Shakıev kezdeskeni jáne qazaq halqyna tán qonaqjaılyq kórsetkeni úshin Qasym-Jomart Toqaevqa alǵys aıtyp, Qyrǵyzstan Prezıdenti Sadyr Japarovtyń izgi tilegi men sálemin jetkizdi. Spıkerdiń aıtýynsha, Qazaqstan men Qyrǵyzstan barlyq jaǵynan eń jaqyn elder sanalady jáne ózara túsinistik pen qoldaýǵa negizdelgen jan-jaqty yntymaqtastyq tereńdep keledi. Sonymen qatar ol Qazaqstanda júrgizilip jatqan reformalarǵa qoldaý bildirdi.
Kezdesýde Qazaqstan men Qyrǵyzstan arasyndaǵy mádenı-gýmanıtarlyq baılanystardy odan ári damytý máseleleri talqylandy.
Kezdesý sońynda Memleket basshysy Qyrǵyzstan Prezıdentine izgi tilegi men sálemin joldady.