Prezıdent Qasym-Jomart Toqaev Qaraǵandy oblysynda "ArselorMıttal Temirtaý" aksıonerlik qoǵamyna qarasty Kostenko atyndaǵy shahtada bolǵan órt saldarynan qaza tapqan kenshilerdiń otbasy men týǵan-týystaryna kóńil aıtty
Bul aqparat Aqordanyń Telegram-daǵy arnasynda jarıalandy.
"Men memleket basshysy retinde barshańyzǵa kóńil aıtamyn. Bul – qasiret. Bárin túsinemin. Apat boldy. Apattyń kesirinen kóptegen adam qaza tapty. Sondyqtan bul jerge arnaıy keldim. Tıisti sharalar qabyldaımyz, sonyń ishinde zardap shekkenderdiń otbasyna kómek kórsetemiz. Qaza tapqandar men zardap shekkenderdiń otbasylary eshqandaı muqtajdyq kórmeýi úshin Úkimet, ákimdik jáne qaıyrymdylyq uıymdarynyń aldynda jan-jaqty kómek kórsetý mindeti tur", – dedi prezıdent.
Memleket basshysynyń aıtýynsha, jer astynda qalǵan kenshilerdi qutqarý, zardap shekken jáne qaza bolǵan azamattardyń otbasylaryna jan-jaqty kómek kórsetý – kezek kúttirmeıtin mindet
"Eń aldymen, qutqarý jumystary júrgiziledi. Ekinshiden, zardap shekkender men medısınalyq kómekke muqtaj azamattardyń naqty sanyn anyqtaýymyz kerek. Úshinshiden, osy apattan zardap shekkenderdiń barlyǵynyń otbasyna materıaldyq kómek kórsetemiz. Eger qajet bolsa, arnaıy qor ashamyz. Munymen ózim aınalysamyn", – dedi prezıdent.