Strategıalyq seriktestiginiń damý perspektıvalaryn talqylady.
Memleket basshysy Qasym-Jomart Toqaev Qazaqstanǵa jumys saparymen kelgen Túrkıanyń Syrtqy ister mınıstri Mevlút Chavýshoǵlýmen onlaın-kezdesý ótkizdi, dep habarlaıdy Almaty-akshamy.kz Aqordaǵa silteme jasap.
Áńgimelesý barysynda olar saýda-ekonomıkalyq, ınvestısıalyq jáne mádenı-gýmanıtarlyq yntymaqtastyqty odan ári nyǵaıtýǵa mán bere otyryp, qazaq-túrik strategıalyq seriktestiginiń damý perspektıvalaryn talqylady.
Qazaqstan kóshbasshysy Túrkıa Prezıdenti Rejep Taııp Erdoǵanǵa júrekjardy sálemin joldap, ony Qazaqstanǵa saparmen osy jyly kelýge shaqyrǵanyn taǵy da naqtylady. Sapar merzimi dıplomatıalyq kanaldar arqyly pysyqtalady.
Memleket basshysy kelesi aptada Nur-Sultanda ótetin Qazaqstan men Túrkıanyń Saýda-ekonomıkalyq yntymaqtastyq jónindegi memleketaralyq komısıasynyń XII otyrysy ózara tıimdi seriktestikti odan ári damytýǵa yqpal etetinin aıtty. Qasym-Jomart Toqaev túrik kompanıalary qatysatyn birlesken jobalarǵa Qazaqstan Úkimeti tarapynan qoldaý kórsetiletinin rastady.
Mevlút Chavýshoǵlý kezdesýge múmkindik bergeni úshin Qazaqstan Prezıdentine alǵys aıtty. Sondaı-aq mınıstr qańtar oqıǵasy kezinde bolǵan qaıǵyly jaǵdaılarǵa baılanysty kóńil aıtyp, Qasym-Jomart Toqaevqa Rejep Taııp Erdoǵannyń sálemin jetkizdi.
Túrik dıplomaty Qazaqstan Prezıdentiniń basshylyǵymen júzege asyrylyp jatqan saıası jáne ekonomıkalyq reformalardy Túrkıanyń tolyq qoldaıtyny jóninde aıtty.