Jastar zańnamany jetildirý boıynsha óz usynystaryn engize alady.
Almatyda memlekettik jastar saıasaty máseleleri jónindegi zań jobasynyń tanystyrylymy ótti, dep habarlaıdy Almaty-akshamy.kz.
Shara barysynda usynylǵan ózgerister men tolyqtyrýlardy talqylaýǵa jastar uıymdarynyń, resýrstyq ortalyqtardyń ókilderi, jas belsendiler men jas kóshbasshylar qatysty.
«Kezdesýge atalmysh zań jobasy boıynsha jumys tobynyń jetekshisi, QR Parlamenti Májilisiniń depýtaty Elnur Beısenbaev pen Jastar jáne otbasy isteri komıtetiniń tóraǵasy Shahmardan Baımanov qatysty», - delingen Aqparat jáne qoǵamdyq damý mınıstrliginiń baspasóz qyzmetiniń habarlamasynda.
Jastar ókilderiniń bastamasy boıynsha zań jobasy jáne basqa da memlekettik qoldaý sharalary sheńberinde talqylaýǵa keń aýqymdy máseleler usynyldy. Olardyń ishinde kásipkerlikti damytý, jas otbasylardy qoldaý, shyǵarmashylyq jáne kreatıvti ındýstrıany damytý úshin jaǵdaı jasaý jáne t.b. Sonymen qatar, jastardyń jasyn 35-ke deıin ulǵaıtý qajettigi týraly másele kóterilip, basqarýshylyq sheshimder qabyldaý prosesteriniń ashyqtyǵyn arttyrý, qoǵamdyq uıymdar men táýelsiz sarapshylardy áleýmettik-ekonomıkalyq reformalardy talqylaýǵa tartý máselesi de talqylandy.
«Qazaqstannyń jastar aqparattyq qyzmeti» QQ basshysy Irına Mednıkova jastar úshin turǵyn úıdiń qoljetimdiligi máselelerin sheshýde jańa tásilder engizýdi usyndy.
Almaly aýdandyq Jastar resýrstyq ortalyǵynyń úılestirýshisi Baýyrjan Mahanbet Almaty mektepterine JOO stýdentteri kelip qarjylyq saýattylyqty arttyrý máseleleri boıynsha fakúltatıvter men birqatar paıdaly kýrstardy ótkizýin usyndy.
Qazirgi ýaqytta QR Parlamenti Májilisinde osy zań jobasyn qaraý boıynsha jumys júrgizilýde. Onyń aıasynda jas qazaqstandyqtar memlekettik jastar saıasaty týraly zańnamany jetildirý boıynsha usynystar engize alady.
