Qytaı eliniń basshysy Qazaqstan Prezıdentin Beıjińdegi Halyq jınalysy úıinde qarsy aldy.
Mártebeli meımannyń kelýine oraı Qurmet qaraýyly sap túzep turdy. Sodan keıin memleketter basshylary óz delegasıalarymen birge Úlken shyǵys zalynda kelissóz júrgizdi, dep habarlaıdy almaty-akshamy.kz.
Qasym-Jomart Toqaev Sı Szınpınniń «Bir beldeý, bir jol» halyqaralyq yntymaqtastyǵynyń III forýmyna qatysýǵa shaqyrýyn zor yqylaspen qabyl alyp, Qytaıǵa taǵy da saparmen kelgenin atap ótti.
─ Qazaqstan Sizdiń osy jahandyq bastamańyzǵa alǵashqy kúnnen bastap qoldaý bildirdi jáne ony ilgeriletýge belsendi atsalysyp keledi. Osydan týra 10 jyl buryn Astanada sóılegen sózińizde Sizdiń osy bastama týraly aıtqanyńyz esimizde. Oraıly sátti paıdalana otyryp, Sizdi osy megajobany júzege asyrý barysynda keremet nátıjege qol jetkizýińizben quttyqtaımyn jáne aıtýly sharanyń tabysty ótýine tilektestik bildiremin. Sondaı-aq Sizdi Qytaı Halyq Respýblıkasynyń qurylǵanyna 74 jyl tolýymen jáne Hanchjoýda ótken XIX jazǵy Azıa oıyndaryndaǵy Qytaı komandasynyń zor jetistigimen quttyqtaımyn. Biz Qytaıdyń qarqyndy damýyn erekshe yqylaspen baqylap otyrmyz. Sizdiń dana basshylyǵyńyzben Qytaı álemdik jetekshi derjavaǵa aınalýdy kózdegen asqaq muratyna jetýge batyl qadam jasap keledi, – dedi Prezıdent.
QHR Tóraǵasy shaqyrýyn qabyl alǵany úshin Memleket basshysyna alǵys aıtyp, ózara tıimdi yntymaqtastyqty nyǵaıtý mańyzdy ekenin atap ótti
– Joǵary deńgeıdegi «Bir beldeý, bir jol» halyqaralyq yntymaqtastyǵynyń III forýmyna qosh keldińiz. Ornyqty ári qarqyndy qazaq-qytaı qatynastary eki el arasyndaǵy ózara senimdi nyǵaıtyp, beıbitshilik pen turaqtylyqty qoldaý isinde batyl áreket etýge septigin tıgizedi. Halyqaralyq jaǵdaıdyń qalaı qubylatynyna qaramastan, Qytaı men Qazaqstan ózderiniń bastapqy ustanymdarynan aınymaı, bir-birine járdemdesedi. Elderimiz arasynda dostyq qatynastar ornaǵan jyldar ishinde biz máńgilik ári jan-jaqty strategıalyq seriktestik qalyptastyra aldyq. «Bir beldeý, bir jol» jobasyn 10 jyl buryn Qazaqstanda kótergen edim, – dedi Sı Szınpın.
QHR Tóraǵasynyń aıtýynsha, Qytaı Qazaqstannyń egemendigi men aýmaqtyq tutastyǵyn, sondaı-aq Qasym-Jomart Toqaevtyń bastamasymen júzege asyrylyp jatqan aýqymdy reformalardy tolyqtaı qoldaıdy.
Kelissóz barysynda taraptar saýda-ekonomıka, munaı-gaz, munaı hımıasy, energetıka, qarjy, kólik-tranzıt, atom ónerkásibi, mashına jasaý, týrızm, elektrondy komersıa jáne joǵary tehnologıa salalaryndaǵy jan-jaqty yqpaldastyqty damytý máselelerin talqylady. Memleketter basshylary birlesken ınvestısıalyq jobalardy júzege asyrý, sondaı-aq mádenıetaralyq baılanystarǵa jaǵdaı jasaý mańyzdy ekenine nazar aýdardy. Budan bólek, memleketter basshylary halyqaralyq jáne óńirlik kún tártibindegi ózekti máseleler jóninde pikir almasty.
