Memleket basshysyna Almaty qalasynyń bıylǵy I toqsandaǵy áleýmettik-ekonomıkalyq damý qorytyndysy jóninde baıandaldy, dep habarlaıdy Almaty-akshamy.kz.
Osy kezeńde qysqamerzimdi ekonomıkalyq ındıkator iskerlik belsendilik esebinen 23,9 paıyzǵa deıin údedi. Al iskerlik belsendilik kórsetkishi 57,9 paıyzǵa deıin ósip, óńirler arasynda birinshi orynǵa shyqty.
Prezıdentke ekonomıkany odan ári ártaraptandyrý jónindegi sharalar týraly esep berildi. Bıyl shaǵyn jáne orta bıznestiń 3 myń jobasyna 43 mıllıard teńge kóleminde qoldaý kórsetý josparlanǵan. Faktorıńtik kelisimderdi qarjylandyrý úshin qosymsha 4 mıllıard teńge bólindi. Óńdeý ónerkásibindegi ósimdi qamtamasyz etý úshin 5 shaǵyn ónerkásip parki ashyldy.
Sonymen qatar Memleket basshysyna «Almaty qalasyn damytýdyń 2025 jylǵa deıingi baǵdarlamasy men 2030 jylǵa deıingi ortamerzimdi perspektıvalary» aıasynda iske asyrylyp jatqan Almatynyń kólik júıesin qalyptastyrý barysy týraly málimet berildi. Bıyl qalada qoǵamdyq kóliktiń ekologıaǵa zıandy áserin azaıtý týraly Prezıdent tapsyrmasyn oryndaýǵa basa mán beriledi. Gazben júretin 600 jańa avtobýs jáne 100 troleıbýs satyp alý úshin 66 mıllıard teńgeden astam qarajat bólý josparlanyp otyr. Sondaı-aq jeke tasymaldaýshylar 650 jańa avtobýs pen 31 elektrobýs satyp alady.
Budan bólek, Qasym-Jomart Toqaevqa jol ınfraqurylymyn jańǵyrtý sapasyn jaqsartý jospary tanystyryldy.
Kezdesý barysynda ókilettikterdi ortalyqsyzdandyrý jónindegi Memleket basshysynyń tapsyrmasyn oryndaý máselesine de erekshe nazar aýdaryldy. 1 sáýirden bastap qalalyq ákimdiktiń 15 fýnksıasy aýdandyq ákimdikterge berilip, olardyń búdjeti 2,7 ese, ıaǵnı 161,6 mıllıard teńgege deıin ulǵaıtyldy.
Kezdesý sońynda Qasym-Jomart Toqaev ınvestısıa tartý jáne áleýmettik mańyzy bar azyq-túlik taýarlary baǵasynyń turaqtylyǵyn qamtamasyz etý sharalaryn qabyldaý jóninde birqatar naqty tapsyrma berdi.