Memleket basshysy «Astana» halyqaralyq qarjy ortalyǵynyń basqarýshysy Renat Bekturovty qabyldady
Prezıdentke ortalyqtyń bıylǵy birinshi jartyjyldyqtaǵy qyzmetiniń negizgi nátıjeleri jáne aldaǵy kezeńge jospary tanystyryldy, dep habarlaıdy aqshamnews.kz
Renat Bekturovtyń aıtýynsha, búginde Qarjy ortalyǵy arqyly Qazaqstanǵa 12 mıllıard dollardan astam ınvestısıa tartylǵan. Bul 2025 jylǵa belgilengen maqsatty kórsetkishten asyp túsedi. AHQO qurylǵan sátten bastap onyń qatysýshylary búdjetke 115 mıllıard teńge salyq tóledi. Onyń 29,8 mıllıard teńgesi osy jyldyń birinshi jartyjyldyǵynda túsken. Qarjy ortalyǵyna qatysýshylar sanynyń artýy men kompanıalar qyzmetiniń jandanýy salyq túsimderiniń ulǵaıýyna negizgi sebep bolyp otyr.
2024 jyldyń alǵashqy alty aıynda Ortalyqqa 500-den astam kompanıa qosyldy. Bul qatysýshylardyń jalpy sanyn 3 myńǵa deıin arttyrýǵa jáne jańa jumys oryndaryn ashýǵa aıtarlyqtaı yqpal etti. Bıylǵy ekinshi toqsannyń sońyndaǵy esep boıynsha AHQO ıýrısdıksıasyndaǵy kompanıalar 7600-den astam jumys ornyn ashty.
Qasym-Jomart Toqaevqa «Astana» halyqaralyq qarjy ortalyǵynyń bıznes-qoǵamdastyqty qoldaýǵa baǵyttalǵan sharalary týraly aıtyldy. Renat Bekturov bıyl maýsym aıynda AIFC Community bastamasy aıasynda alǵashqy is-shara ótkenin habarlady. Sondaı-aq bıyl 5-6 qyrkúıekte bolatyn dástúrli Astana Finance Days 2024 sharasyna daıyndyq barysyn baıandady.
Prezıdent Qarjy ortalyǵyn odan ári damytý baǵytynda birqatar mindet júktedi. Atap aıtqanda, el ekonomıkasyna ınvestısıa tartý úshin AHQO ınfraqurylymyn belsendi paıdalana otyryp, barlyq memlekettik organ men qarjy ınstıtýttarynyń kúsh-jigerin biriktirý qajet ekenin atap ótti.