2024 jylǵy shomylý maýsymy bastalǵaly elimizdiń sý aıdyndarynda 100-den astam adam sýǵa batty, onyń 35-i balalar. Bul týraly Almaty qalasynyń óńirlik komýnıkasıalar qyzmetiniń brıfıńinde Almaty qalasy TJD azamattyq qorǵanys basqarmasynyń aǵa ofıseri, kapıtan Esbol Sultanov málimdedi, dep habarlaıdy aqshamnews.kz
«2024 jylǵy shomylý maýsymy kezeńinde Almaty qalasynyń sý aıdyndarynda tótenshe jaǵdaılar tirkelgen joq. Almatyda jáne taý bókterindegi aýdandarda barlyǵy 44 sý aıdyny (toǵandar, kólder, ózender) bar. Sý aıdyndarynyń qaýipti ýchaskelerinde 83 «shomylýǵa tyıym salynady" degen belgi jáne 7 aqparattyq stend ornatyldy», – dedi Esbol Sultanov.
2024 jylǵy shomylý maýsymy kezeńindegi qaýipsizdikti qamtamasyz etý maqsatynda Departament memlekettik organdarmen jáne uıymdarmen birlesip belgili bir jumys júrgizýde.
«680-den astam birlesken reıd júrgizildi, onyń sheńberinde sý aıdyndaryndaǵy qaýipsizdik erejelerin buzǵany úshin QR ÁQBtK-niń 412-baby boıynsha jalpy somasy 595 myń teńgege 23 adam ákimshilik jaýapkershilikke tartyldy, 364-bap boıynsha jalpy sý paıdalaný erejelerin buzǵany úshin 6 adamǵa eskertý berildi, 440-bap boıynsha alkogóldik ishimdikterdi ishkeni úshin QR ÁQBtK-niń 412-baby boıynsha 6 adam ákimshilik jaýapkershilikke tartyldy, somasy 110 760 teńge», - dedi ol.
ÓKQ spıkeri kún saıyn QR TJM RJQO qutqarýshylary Bostandyq, Medeý jáne Naýryzbaı aýdandarynyń taýly ózenderinde reıdter júrgizetinin atap ótti.
Apta saıyn uıaly baılanys operatorlary arqyly «Almaty qalasynda belgilenbegen jerlerde shomylýǵa tyıym salynady», «Balalardy sý aıdyndarynda eresekterdiń qaraýynsyz qaldyrmańyz» degen mátinmen SMS-taratylady.
Eki jyl buryn Almatyda júzý shekarasyn anyqtaýǵa jáne batyp bara jatqandardy erte anyqtaýǵa múmkindik beretin qashyqtyqtan monıtorıń júrgizetin júıe synalǵan bolatyn. Qazirgi ýaqytta qala sý aıdyndarynyń 9 qaýipti ýchaskesinde osyndaı kameralar ornatýdy josparlap otyr.
Esbol Sultanov jaqyn arada Saıran kóli Almaty turǵyndary men qonaqtary úshin jaıly jáne qaýipsiz demalys ornyna aınalatynyn aıtty. Qala ákimi Erbolat Dosaevtyń ókimimen munda negizgi sý aıdynyn qaıta qurý boıynsha aýqymdy joba júzege asyrylýda.
QR TJM Respýblıkalyq jedel-qutqarý jasaǵynyń súńgýir-qutqarý bólimshesiniń basshysy Andreı Bybchenko sý aıdyndarynda qaýipsizdikti qamtamasyz etý maqsatynda praktıkalyq jáne profılaktıkalyq is-sharalar kesheni júrgizilip jatqanyn atap ótti.
«Barlyq qyzmetter sý aıdyndarynyń, saıabaq aımaqtarynyń jaǵdaıyn jaqsartý úshin jumys isteıdi. Jáne adamdarǵa tek qaýipsizdik tehnıkasy aıtylyp qana qoımaı, demalys mádenıeti týraly aqparat jetkizetin reıdter júrgizilýde», - dedi ol.
TJD azamattardy sýdaǵy qaýipsizdik erejelerin saqtaýǵa shaqyrady:
- tyıym salynǵan jerlerde shomylýǵa bolmaıdy;
- balalardy sýdyń janynda qaraýsyz qaldyrmańyz;
- júze almasańyz belden joǵary sýǵa túspeńiz;
- qaıyqtardan, kópirlerden jáne aılaqtardan sýǵa sekirmeńiz;
- túnde shomylýǵa bolmaıdy;
- taý ózenderinde shomylýǵa bolmaıdy.