Prezıdent Oqý-aǵartý mınıstri Ǵanı Beısembaevty qabyldady.
Memleket basshysyna mektepke deıingi, orta, tehnıkalyq jáne kásiptik bilim berý salalaryn damytý úshin qabyldanyp jatqan sharalar jóninde málimet berildi, dep habarlaıdy Almaty-akshamy.kz.
Prezıdentke bıyl qyrkúıek aıynan bastap mektepke deıingi bilim berý mekemelerindegi pedagogtardyń eńbekaqysy 30 paıyzǵa ósetini týraly baıandaldy. Jyl sońyna deıin balabaqshalarda 81 myń oryn ashý josparlanyp otyr. Sonymen qatar halyqtyń áleýmettik osal toptaryna jatatyn 98 myń bala tegin ystyq tamaqpen qamtamasyz etiledi.
Oqý-aǵartý mınıstriniń aıtýynsha, pedagogtardy atestattaý rásimi jetildirilip jatyr. Endi olardyń kásibı biliktiligi pándi qanshalyqty jaqsy biletinine qaraı, al jumysynyń nátıjesi bilim alýshylardyń oqý jetistikteri negizinde baǵalanady.
Ǵanı Beısembaev bıyl 1 qyrkúıekten bastap 1-4 synyp oqýshylary tolyqtaı tegin tamaqpen qamtamasyz etiletinin aıtty. Sondaı-aq bilim berý uıymdaryn dabyl túımelerimen, lısenzıasy bar kúzetpen, týrnıkettermen jáne jedel basqarý ortalyqtaryna qosylǵan beınebaqylaý júıelerimen jabdyqtaý josparlanyp otyr.
Sonymen qatar Memleket basshysyna Aýyl mektepterin damytý tujyrymdamasy tanystyryldy. Bıyl tehnıkalyq jáne kásiptik bilim alýshy stýdentterdiń 80 paıyzy tegin oqıdy. Qyrkúıek aıynan bastap olardyń shákirtaqysy 50 paıyzǵa, al kelesi jyly 100 paıyzǵa artady. Kásiporyndar kolej túlekterin mindetti túrde jumysqa ornalastyrý shartymen mamandardy maqsatty daıarlaý isine alǵash ret atsalysyp otyr.
Kezdesý sońynda Prezıdent Qasym-Jomart Toqaev Oqý-aǵartý mınıstrine bilim berý júıesin odan ári jetildirý jáne balalardyń qaýipsizdigin qamtamasyz etý isine udaıy kóńil bólýdi tapsyrdy.