Memleket basshysy: Jastardyń otanshyldyq rýhyn kúsheıtý kerek
Qasym-Jomart Toqaev Memlekettik týdy qorlaǵandarǵa qatysty pikir bildirdi. Bul týraly el Prezıdenti Ulttyq ǵylym akademıasynyń 75 jyldyǵyna arnalǵan saltanatty sesıada aıtty, dep habarlaıdy Almaty-akshamy.kz Almaty.tv saıtyna silteme jasap.
"Biz ǵylymnyń ulttyq ekonomıkaǵa qosatyn úlesin kóbeıtýimiz kerek. Sonymen birge, álemdik ǵylymı keńistikpen yqpaldastyqty kúsheıtken jón. Ǵalymdar elimizdiń rýhanı damýyna da basa mán bergeni durys", - dedi saltanatty jıynda Memleket basshysy.
Toqaev jastardyń otanshyldyq rýhyn kúsheıtý kerek ekenin atap ótti.
"Qazir áleýmettik jelide Memlekettik Týdy qadirleý týraly kóptegen oı-pikirler aıtylýda. Ókinishke qaraı, qasıetti kók Týymyzǵa baılanysty oryn alǵan jaǵymsyz jaǵdaılar azaımaı tur. Sondyqtan, baıraǵymyzdy paıdalaný tártibin qaıta qaraý kerek dep oılaımyn. Qajet bolsa, tıisti zańdarǵa ózgertýler engizýge bolady. Óıtkeni, kók Týymyz – qasterli Táýelsizdigimizdiń sımvoly", - dedi ol.
Memleket basshysy halqymyzdyń «Týǵan jerge týyńdy tik» dep beker aıtpaǵanyn, árqashan Týyn bıik ustaǵan el ekenimizdi atap ótti.
Sondaı-aq Qanysh Sátbaevtyń "Óz eliniń qara tasyn maqtan ete almaǵan, ózge jerdiń altynyn da maqtap jarytpaq emes" degen sózin mysalǵa keltirdi.
"Memlekettik rámizderimizdi qasterleý – ár azamattyń perzenttik paryzy. Osyny óskeleń urpaqtyń sanasyna sińiretin, eń áýeli, sizder, ıaǵnı zıaly qaýym", - dedi Prezıdent.