Memleket basshysy Parlament Májilisiniń tóraǵasy Erlan Qoshanovty qabyldady, dep habarlaıdy Almaty-akshamy.kz Egemen.kz-ke silteme jasap.
Májilis spıkeri Prezıdentke depýtattardyń halyqpen ótkizgen kezdesýleriniń qorytyndysy týraly málimet berdi. Májilis depýtattary aldaǵy referendýmnyń jáne Konstıtýsıaǵa engiziletin ózgeristerdiń mańyzdylyǵyn túsindirý úshin óńirlerge saparmen bardy.
Depýtattar kún saıyn 250-ge deıin is-shara ótkizgen. Eńbek ujymdarynda, bazarlarda, áleýmettik nysandarda jáne shalǵaı eldi mekenderde ótken kezdesýlerde turǵyndarmen ashyq pikir almasýǵa basa mán berildi. Jalpy azamattar usynylyp otyrǵan reformalardy qoldaıdy jáne referendýmǵa qatysýǵa daıyn.
Jalpyulttyq referendýmǵa qatysty túsindirý naýqanyna AMANAT partıasy da atsalysqan. Respýblıkalyq jáne oblystyq shtabtar, máslıhattardyń barlyq deńgeıindegi fraksıa depýtattary men partıanyń jastar qanaty belsendi jumys istep jatyr.
Májilis depýtattary saparlarynyń barysynda turǵyndardy tolǵandyryp júrgen ózekti máseleler jóninde ashyq pikir almasty. Kóterilgen barlyq másele bekitilgen algorıtmge sáıkes Úkimetpen birlese júıelenip, pysyqtalady.
Erlan Qoshanov Qasym-Jomart Toqaevqa palatanyń zań shyǵarý qyzmeti týraly baıandady. Atap aıtqanda, sesıa bastalǵaly beri 64 zań jobasy maquldanǵan jáne 51-i qaralyp jatyr. Olardyń ishinde Memleket basshysynyń tapsyrmalaryn júzege asyrý aıasynda ázirlengen zań jobalary da bar.
Prezıdentke Úkimet pen Esep komıtetiniń byltyrǵy respýblıkalyq búdjettiń jumsalýy jónindegi esebin qoǵamdyq tyńdaýǵa, sondaı-aq sý resýrstary týraly parlamenttik tyńdaýlar ótkizýge daıyndyq jumystarynyń barysy týraly baıandaldy.
Májilis tóraǵasy Prezıdentke parlamenttik dıplomatıa aıasyndaǵy jumystardy kúsheıtý jóninde málimet berdi. Atap aıtqanda, mamyr aıynda Jambyl oblysy Qordaı aýylyndaǵy shekara zastavasynda Qazaqstan men Qyrǵyzstan parlamentteriniń halyqaralyq ister jáne qorǵanys jónindegi salalyq komıtetteriniń birlesken kóshpeli otyrysy ótkizildi. Onda Eýrazıalyq ekonomıkalyq odaq aıasyndaǵy saýda-ekonomıkalyq yntymaqtastyqty, kólik-logıstıkalyq jáne kedendik rásimderdi jaqsartý máseleleri qarastyryldy.
Maýsym aıynda depýtattar Armenıadaǵy UQSHU Parlamenttik Assambleıasynyń keńesi men Qyrǵyzstandaǵy Túrkitildes elderdiń Parlamenttik Assambleıasy keńesiniń otyrystaryna qatysady dep josparlanyp otyr. Bul jıyndarda zań shyǵarý qyzmeti men saılaýdy baqylaý jónindegi yntymaqtastyqty nyǵaıtýdyń perspektıvalary talqylanbaq.