Syrdarıa ózeni baseıninde sý taıazdyǵy talqylandy
QR Premer-Mınıstri Álıhan Smaıylov Sý keńesiniń otyrysyn ótkizdi, dep habarlaıdy Almaty-akshamy.kz Inform.kz-ke silteme jasap.
Onda bir memlekettik organǵa sýmen jabdyqtaý jáne sýmen qamtamasyz etý fýnksıalaryn biriktirý máseleleri, sondaı-aq Syrdarıa ózeni baseınindegi sý sharýashylyǵy jaǵdaıy qaraldy. Birinshi másele boıynsha baıandama jasaǵan ekologıa, geologıa jáne tabıǵı resýrstar mınıstri Serikqalı Brekeshev qazirgi tańda memlekettik sý saıasatyn iske asyrý túrli memlekettik organdardyń quzyrynda ekenin atap ótti.
Osylaısha, azamattardy jáne ekonomıka salalaryn sýmen qamtamasyz etýge, sondaı-aq sý resýrstaryn paıdalaný men qorǵaýǵa qatysty fýnksıalar úsh mınıstrlikke — Ekologıa, geologıa jáne tabıǵı resýrstar, Aýyl sharýashylyǵy, Indýstrıa jáne ınfraqurylymdyq damý mınıstrlikterine júktelgen. Memleket basshysynyń tapsyrmasyn oryndaý aıasynda Ekologıa, geologıa jáne tabıǵı resýrstar mınıstrligine sý resýrstaryn basqarýǵa, sý burýǵa, azamattar men ekonomıka salalaryn sýmen qamtamasyz etýge, sondaı-aq sý ekojúıelerin qoldaýǵa baılanysty negizgi fýnksıalardy qosý usynylady.
QR Premer-Mınıstri usynylǵan tásilderge qatysty birqatar eskertý jasap, vedomstvoaralyq úılestirýdi kúsheıte otyryp (jekelegen baǵyttar boıynsha), olardy qosymsha pysyqtaýdy tapsyrdy. Kún tártibindegi ekinshi máseleni talqylaý barysynda bıyl Syrdarıa ózeni baseıninde sý taıazdyǵy sıkli jalǵasyp jatqany aıtyldy. Bul oraıda baseın elderi sý sharýashylyǵyndaǵy kúrdeli jaǵdaıdyń teris saldaryn boldyrmaý úshin kelisip áreket etýde.
Máselen, Toqtoǵul sý qoımasynda sýdyń jınalý jaǵdaıy turaqtandy. Qazaqstan men Ózbekstan «Bahrı Tochık» sý qoımasynyń qarqyndy vegetasıalyq kezeńdegi jumys rejımin Tájikstanmen kelisip jatyr. Bul sharalar Syrdarıa ózeniniń joǵarǵy jáne orta aǵysyndaǵy, sondaı-aq Túrkistan oblysynyń Jetisaı jáne Maqtaaral aýdandaryndaǵy fermerlerdi «Dostyq» kanaly arqyly maýsym-tamyz aılarynda shamamen 550 mln m3 kóleminde – ótken jylǵy deńgeıde sýarmaly sýmen qamtamasyz etýge múmkindik beredi. Álıhan Smaıylov atalǵan jumysty baqylaýda ustap, Qazaqstannyń memleketaralyq yntymaqtastyq aıasyndaǵy mindettemelerin oryndaý formatyn naqtylaýdy tapsyrdy.