Prezıdent Joldaýynda aıtylǵan aýqymdy saıası ózgerister men áleýmettik-ekonomıkalyq is-sharalardy iske asyrý úshin Jalpyulttyq jospar ázirlendi.
Ol negizgi 10 baǵyttan turady. Birinshi kezekte asa mańyzdy saıası reformalardy iske asyrý kózdelip otyr, dep habarlaıdy Almaty-akshamy.kz QazAqparatqa silteme jasap.
«Ol úshin Prezıdenttiń ókilettigi, Parlament Senaty men Májilisiniń, máslıhattardyń, ákimderdiń fýnksıalary men olardy qurý tártibi, saıası partıa qurý máselelerine qatysty konstıtýsıalyq zańdar men basqa da zańdarǵa ózgerister engizý qajet. Sondaı-aq, elimizdiń ákimshilik-aýmaqtyq qurylysy ózgeredi. Daǵdarysqa qarsy shuǵyl sharalar kesheni iske asyrylady», - dedi Úkimet basshysy.
Onyń atap ótýinshe, usynylǵan Jalpyulttyq is-sharalar jospary Joldaýda aıtylǵan mindetterge tolyq sáıkes keledi jáne barlyq kelisý rásimderinen ótti.
«Sondyqtan jospardy oryndaýǵa dereý kirisýimiz qajet. Ondaǵy árbir is-sharanyń sapaly jáne ýaqytyly oryndalýyna birinshi basshylar tikeleı jaýapty ekenin basa aıtqym keledi. Orynbasarlaryma jospardyń oryndalýyn qatań baqylaýǵa alýdy tapsyramyn», - dedi Álıhan Smaıylov.