Qazaqstan Respýblıkasynyń Premer-Mınıstri Álıhan Smaıylov «AMANAT» partıasy fraksıasynyń keńeıtilgen otyrysyna qatysyp jatyr.
Ol jıyn barysynda Prezıdenttiń buǵan deıingi joldaýlarynyń qalaı júzege asyrylyp jatqanyna toqtaldy, dep habarlaıdy Almaty-akshamy.kz 24.kz-ke silteme jasap.
«Memleket basshysynyń joldaýlaryn iske asyrý sheńberinde áleýmettik salada júıeli sharalar qabyldandy. Jańa Áleýmettik kodeks eńgizildi. Ol azamattardy týǵannan bastap egde jasqa jetkenge deıin áleýmettik qoldaýdy kózdeıdi. Balalary bar otbasylardy áleýmettik qoldaý úshin bala kútimi kezeńi 1,5 jasqa deıin ulǵaıtyldy. Kóp balaly analarǵa beriletin járdemaqy artty. Búginde bul járdemaqyny 750 myńnan astam ana alady», – dedi Úkimet basshysy.
1 qyrkúıekten bastap jalpy bilim beretin mektepterdiń 1-4-shi synyptaǵy balalary tegin tamaqtandyrýmen qamtamasyz etiledi.
«Sondaı-aq, bıyl áleýmettik jaǵynan osal otbasylardan shyqqan 97 myń balanyń balabaqshalarda tegin tamaqtaný máselesi sheshildi. Osylaısha, memleket osy sanattaǵy balalardyń mektepke deıingi bilim berý shyǵystaryn óz moınyna aldy», – dedi ol.
Memleket basshysynyń tapsyrmasy boıynsha múgedektigi bar jáne asyraýshysynan aıyrylǵan adamdarǵa beriletin áleýmettik járdemaqy 23%-ke artty.
«2 mıllıonnan astam zeınetkerdiń zeınetaqysyn saralap arttyrý júrgizildi. Búginde memlekettiń zeınetaqy baǵdarlamasy boıynsha shyǵystar 3 trln teńgeden asady. Memleket basshysynyń tapsyrmasyna sáıkes áıelderdiń zeınet jasy 2028 jylǵa deıin 61 jas deńgeıinde bektildi. Osyǵan baılanysty zeınetaqyǵa arnalǵan shyǵystar 800 mlrd teńgeden astam qosymsha somany quraıdy», – dedi Álıhan Smaıylov.
Bıyl azamattarǵa óz zeınetaqy jınaqtaryn basqarý quqyǵy berildi.
«Salymshylar zeınetaqy jınaqtary somasynyń 50%-in ózderi tańdaǵan jeke basqarýshy kompanıalarǵa bere alady. Budan basqa, 1 mıllıonnan astam adam zeınetaqy jınaqtaryn turǵyn úı jaǵdaılaryn jaqsartýǵa jáne emdelýge paıdalandy. Bıyl basynan bastap Úkimet Otbasynyń sıfrlyq kartasyn engizdi. 500 myńnan astam qazaqstandyqqa proaktıvti áleýmettik qoldaý kórsetildi», – dedi ol.