Qazaqstan Prezıdentiniń Joldaýy el damýynyń strategıalyq baǵdaryn aıqyndap berdi. Bul qujat memlekettiń aldaǵy kezeńdegi áleýmettik, ekonomıkalyq jáne saıası damýynyń negizgi baǵyttaryn qamtıtyn mańyzdy baǵdarlamaǵa aınaldy.
Prezıdent eldi qysqa merzim ishinde ozyq sıfrlyq memleketke aınaldyrýdy basty maqsat retinde belgiledi. Jasandy ıntellekt mınıstrliginiń qurylýy, Sıfrlyq kodekstiń qabyldanýy jáne sıfrlyq aktıvter qoryn qalyptastyrý – zaman talabyna saı sheshimder. Bul qadamdar elimizdiń ǵylymı-ınnovasıalyq áleýetin arttyryp, jańa tehnologıalyq serpin beredi. Qazaqstannyń halyqaralyq básekege qabilettiligin qamtamasyz etýde mundaı bastamalardyń mańyzy zor.
Ekonomıka salasynda ınflásıamen kúres, zańsyz shyǵarylǵan kapıtaldy elge qaıtarý jáne jańa ınvestısıalardy tartý máseleleri oryndy kóterildi. Kásipkerlerge senim artý, olardy ındýstrıalyq jańǵyrýdyń qozǵaýshy kúshi etý – ýaqyt talabyna saı qadam. Bul baǵyt elde ádiletti ekonomıkalyq júıeni ornyqtyryp, halyqtyń turmys sapasyn kóterýge yqpal etedi.
Qazaqstannyń Eýrazıadaǵy tranzıttik rólin nyǵaıtý – strategıalyq mańyzy bar másele. Konteınerlik jáne mýltımodaldy tasymaldardy damytý, jańa tarıftik saıasatty engizý – elimizdiń kólik dálizderi arqyly ótetin júk aǵynyn eselep arttyrady. Bul tek ekonomıkalyq paıda ǵana emes, eldiń geosaıası salmaǵyn da kóteredi.
Importqa táýeldilikti azaıtý, aýyl sharýashylyǵyn qoldaý jáne azyq-túlik qaýipsizdigin nyǵaıtý mindeti ádil qoıyldy. Bul – ulttyq qaýipsizdiktiń negizgi tirekteriniń biri. Óz ónimimizdi kóbeıtý arqyly eldiń ishki turaqtylyǵyn saqtaýǵa bolady.
Joldaýda Kaspıı teńizin qorǵaý men sý dıplomatıasyn damytýǵa erekshe nazar aýdaryldy. Sý resýrstary – keleshekte memleketaralyq qatynastardyń ózegine aınalatyn faktor. Sondyqtan halyqaralyq uıym qurý bastamasy – der kezinde jasalǵan qadam. Bul tek tabıǵatty qorǵaý ǵana emes, aımaqtyq turaqtylyqty qamtamasyz etýdiń kepili.
Saıası reforma aıasynda qos palataly parlamentten bir palataly júıege kóshý jóninde másele kóterildi. Bul – bılik qurylymyn yqshamdap, sheshim qabyldaýdy jedeldetetin batyl usynys. 2027 jyly referendým ótkizý bastamasy halyqtyń erkin bildirý tetigin kúsheıtedi. Mundaı qadamdar qoǵamdaǵy senimdi arttyryp, saıası júıeniń ashyqtyǵyn qamtamasyz etedi.
Zeınetaqy júıesin jetildirý, demografıany qoldaý, jol qaýipsizdigin kúsheıtý, farmasevtıkalyq salany damytý, buqaralyq sportty órkendetý – halyqtyń ómir sapasyn tikeleı jaqsartatyn bastamalar. Bul – memlekettiń basty qundylyǵy – adam kapıtalyna jasalǵan ınvestısıa.
Prezıdent Joldaýynda patrıotızmniń jańa qyry ashyldy. Ol tek til men mádenıetti saqtaýmen shektelmeı, jasampazdyqqa, bilim men ǵylymǵa umtylýǵa, ınovasıaǵa, radıkalızmnen bas tartýǵa negizdelýi tıis. Bul – ulttyq birlikti nyǵaıtatyn, eldi alǵa bastaıtyn kúsh.
Joldaýda aıtylǵan mindetter – Qazaqstannyń turaqty damýyna, memlekettik júıeniń nyǵaıýyna jáne ulttyq birliktiń artýyna jol ashady. Bul qujat eldiń bolashaǵyn aıqyndaıtyn tarıhı baǵdar retinde baǵalanýy tıis.