7 sáýir kúni Memleket basshysy Qasym-Jomart Toqaev Astana qalasynyń ákimi Jeńis Qasymbekti qabyldady. Prezıdentke elordanyń áleýmettik-ekonomıkalyq jáne ınfraqurylymdyq damýy týraly aqparat berildi, dep habarlaıdy almaty-akshamy.kz
Prezıdentke qala tirshiligin qamtamasyz etý júıesiniń nysandary (SSS-3, gaz jylý stansıalary, JEO-3, t.b.) jáne mektep, medısınalyq ortalyq, jeńildetilgen qoljetimdi turǵyn úı sekildi áleýmettik nysandar qurylysynyń barysy, sondaı-aq apatty jaǵdaıdaǵy eski turǵyn úılerdi súrý, turǵyn úı alaptaryn damytý, úlestik qurylys nysandaryn aıaqtaý, qalaǵa gaz tartý jáne abattandyrý jumystary jóninde baıandaldy.
Astana ákimi bıyl 6,5 myń áleýmettik páter salý josparlanyp otyrǵanyn, sondaı-aq "Jaıly mektep» ulttyq jobasy aıasynda 2 aýysymmen oqıtyn 90 myń oqýshyǵa arnalǵan jańa formattaǵy 24 mekteptiń jobasy jasalyp jatqanyn atap ótti.
Sonymen qatar Memleket basshysyna ınvestısıa tartý sharalary týraly málimet berildi. Elordaǵa quıylǵan ınvestısıa kólemi birinshi toqsanda shamamen 200 mıllıard teńgeni qurady. Bul ótken jyldyń osy kezeńimen salystyrǵanda 20 paıyz kóp.
Qasym-Jomart Toqaev Astanany odan ári damytý, sýmen jáne jylýmen qamtamasyz etý nysandarynyń qurylysyn tez arada aıaqtaý, sondaı-aq elorda turǵyndarynyń ózekti máselelerin sheshý jóninde birqatar tapsyrma berdi.